Raġel instab maqtul f’bagoll ta’ karozza f’Ħal Qormi.
Is-sejba saret it-Tlieta u l-karozza hi l-istess waħda ta’ Mario Farrugia ta’ 62 sena minn Pembroke li ġie rappurtat nieqes il-ġimgħa l-oħra. Madankollu s’issa l-katavru għadu ma ġiex identifikat dan minħabba l-istat qawwi ta’ dekompozizzjoni u għalhekk għadu ma jistax jiġi kkonfermat li hu ta’ Farrugia stess, li għadu rapġurtat nieqes sa issa.
In-numru tar-reġistrazzjoni tal-karozza misjuba f’Ħal Qormi għandha l-istess pjanċi ta’ reġistrazzjoni BGY 074 bħal dik ta’ Mario Farrugia.
B’hekk ġie kkonfermat li din hi l-karozza ta’ Farrugia.
ONE News jista’ jikkonferma li l-karozza nstabet msakkra u ċ-ċwievet ma nstabux fil-karozza.
Madankollu mhux eskluż li dawn jistgħu jinstabu fil-ħwejjeġ tar-raġel.
Fuq il-post il-kelliem tal-Korp tal-Pulizija, Brandon Pisani, qal li jidher li l-karozza Peugout 407 kien ilha pparkjata fil-post li nstabet.
Pisani kkonferma li Mario Farrugia, sid il-karozza ma huwiex magħruf mal-Pulizija.
“Dik hi parti mill-investigazzjoni, il-Pulizija fl-aħħar ħinijiet kienu anke qed jitkellmu ma’ persuni fl-akkwati li jistgħu jagħtu indikazzjoni meta din il-karozza ġiet ipparkjata hawnhekk. Li nista’ ngħid li jidher lill-karozza kien ilha xi ftit jiem ma tinstaq minħabba l-mod ta’ kif instabet, il-ħmieġ tax-xita tal-ħamrija li għamlet jagħti indikazzjoni li kienet ilha xi ftit tal-jiem hawnhekk. Imma meta l-karozza kienet ipparkjata hawnhekk fil-wied huma parti mill-investigazzjoni biex nistabilixxu anke mal-kameras tas-sigurtà biex nistabilixxu dan.”
Fuq il-post dehru numru ta’ uffiċjali tal-Pulizija mill-Iskwadra tal-Omiċidji kif ukoll it-Tabib Forensiku Mario Scerri li analizza l-katavru fuq il-post hekk kif il-Pulizija qed tqis is-sejba tal-katavru bħala parti minn omiċidju.
Kienu ftit qabel it-tlieta ta’ waranofsinhar li l-katavru nħareġ minn fuq il-post fil-karru tal-mejtin.
Fis-sigħat li ġejjin mistennija ssir l-awtopsja fuq dan il-katavru.
Il-Pulizija għalqet ix-xena tar-reat sabiex tippriserva t-traċċi kollha, dan biex tkun tista tikkonsolida l-investigazzjoni tagħha.
Fuq il-post ġew ukoll qraba ta’ Mario Farrugia li ġew mitkellma mill-Uffiċjali tal-Pulizija b’mod privat.
Għalkemm il-Pulizija qed timxi fuq it-teżi t’omiċidju, għad trid tistabilixxi d-dinamika ta’ dan il-każ.
“Hija parti mill-Investigazzjoni sabiex ovvjament nistabilixxu fejn ġara l-każ, jekk ġarax hawnhekk jew ġarax post ieħor u anke meta dan l-omiċidju seta’ seħħ jiġifieri f’liem ġurnata. U ovvjament naslu għall-arresti ta’ persuna jew persuni li allegatament kienu nvoluti f’dan l-omiċidju.”
Intant dwar dan il-każ infetħet inkjesta Maġisterjali mmexxija mill-Maġistrat Gabriela Vella filwaqt li l-investigazzjonijiet tal-Pulizija qed jitmexxew mis-Supretendent Fabian Fleri u l-Assistent Kummissarju Sandro Gatt mill-Iskwadra tal-Omiċidji bil-għajnuna tal-Pulizija tad-Distrett ta’ Ħal Qormi u San Ġiljan.
