Fil-Mużew tal-Bażilika ta’ Sant’Elena, f’Birkirkara, bħalissa qed tittella’ l-esebizzjoni “Tama Waħdanija”. Esebizzjoni li nfetħet is-Sibt filgħodu u tibqa’ għaddejja sa jum id-Duluri.
F’din l-esebizzjoni, wieħed għandu jara diversi kurċifissi ta’ kull qies u daqs maħduma bil-ġebel, bil-fidda u bid-deheb. Apparti minn hekk, wieħed jista’ jara oġġetti oħra esebiti li huma assoċjati mal-knisja.
Għall-ewwel darba f’pajjiżna, jinsab espost ukoll kurċifiss tal-avorju li se jżejjen l-artal ta’ din il-Bażilika.
ONE NEW żar il-ftuħ ta’ din l-esebizzjoni fejn tkellem mal-istudjuża tal-arti, Maria Cassar li qalet li skont riċerka li sar min-naħa tagħha, il-kurċifiss huwa xogħol Franċiż tas-seklu 17.
“Dan il-kurċifiss tal-avorju huwa wieħed mill-kurċifiss tal-avorju l-aktar sbieħ li qatt rajt. Huwa ‘Cristo Vivo’, bi tliet imsiemer. Għandu qagħda maestuża li turi l-idejn tal-artist li għamel l-aħjar użu mis-sinna li ħadem biha.”
Maria Cassar – Studjuża tal-Arti
