Daqqu s-sebgħa ta’ filgħodu, il-kaxxi ssiġġillati, jibdew in-nies jivvutaw, f’temp ta’ ħmistax-il siegħa, seħħet ir-rieda tal-poplu.
Il-poplu għażel Gvern Laburista ieħor, Dr Joseph Muscat reġa’ sar Prim Ministru, l-għaqda rebħet fuq il-firda, il-proposti u l-wegħdiet costed rebħu fuq il-koalizzjoni tal-konfużjoni u beda t-twettiq ta’ manifest elettorali ieħor.
F’erba’ snin ta’ Gvern Laburista ġdid, Gvern għan-nies, komplew isiru wħud mill-akbar riformi soċjali ta’ pajjiżna.
Ftit xhur biss wara l-bidu ta’ leġiżlatura oħra fl-2017, koppji omosesswali issa setgħu jiżżewwġu, bid-drittijiet kollha bħal koppji oħra, issa mhux unjoni ċivili biss.
Mill-budget ta’ sena wara, bdew jingħataw il-festi pubbliċi li jaħbtu fi tmiem il-ġimgħa.
Gvern Laburista ta lura aktar ħin mal-familja li kien ħa Gvern Nazzjonalista.
Il-ħaddiem baqa’ jiġi inċentivat biex jaħdem u ppremjat bir-rifużjoni tat-taxxa u l-pensjonanti baqgħu jieħdu żieda wara l-oħra.
F’dawn l-erba’ snin beda jinbidel wiċċ pajjiżna.
L-infrastruttura ta’ pajjiżna għaddiet minn rivoluzzjoni f’erba’ snin biss.
Beda l-proġett ta’ investiment ta’ seba’ mitt miljun ewro f’seba’ snin u r-riżultat diġà nistgħu narawh illum, b’għadd ta’ toroq lesti u proġetti kbar li tlestew bħal Marsa Junction u oħrajn li jinsabu fuq l-għatba tat-tlestija, bħas-Central Link.
Fil-qasam soċjali seħħet rivoluzzjoni siekta, dik li twieżen min l-aktar jeħtieġ u tippromovi l-bżulija.
Soċjetà ġusta, għax hekk jixraq.
Fil-lokalitajiet tagħna għaddej xogħol fuq l-akbar proġett ta’ housing soċjali mis-sebgħinijiet iżda mhux biss.
Daħlu riformi fil-liġijiet tal-kera, saħansitra għall-kirjiet ta’ qabel l-1995 biex tassew is-sidien u l-inkwilini jieħdu dak li hu tagħhom.
Fl-edukazzjoni, kienu erba’ snin ta’ ħidma fejn issaħħet l-infrastruttura ta’ skejjel eżistenti u l-bini ta’ oħrajn, bħall-iskejjel primarji ġodda bl-isbaħ ambjent għat-tfal tagħna fil-Qawra u f’Wied il-Għajn.
Aktar persuni b’diżabilità bdew jidħlu fid-dinja tax-xogħol, biżżejjed ngħidu biss li f’Għawdex, il-persuni b’diżabilità jirreġistraw naqsu b’65%.
Fuq kollox, l-ekonomija ta’ pajjiżna kompliet tikber u l-finanzi tal-pajjiż komplew jissaħħu biex minn defiċit kellna surplus.
L-ekonomija li tant swiet, frott l-għaqal ta’ dan il-Gvern biex illum, taħt it-tmexxija tal-Prim Ministru Robert Abela, pajjiżna tmexxa waqt pandemija li sa ftit tax-xhur ilu, ftit ħasbu kemm se tħalli impatt fuq id-dinja.
Il-poplu sab Gvern li joħloq bilanċ bejn is-saħħa u l-għajxien tal-familji Maltin u Għawdxin.
Fuq kollox kien hemm Gvern li ma xxaħħaħx biex l-investiment li baqa’ jsir fil-qasam tas-saħħa għamilna wkoll pajjiż ta’ suċċess fejn jidħol il-programm ta’ tilqim bix-xiri tal-vaċċin u llum l-ewwel pajjiż fl-Unjoni Ewropea li laħaq l-immunità għall-virus kontra l-Covid-19.
Illum, f’għeluq ukoll sena u nofs tat-tmexxija ta’ pajjiżna minn Robert Abela, pajjiżna kompla jgħaddi minn aktar riformi, anki waqt l-akbar kriżi globali fl-istorja riċenti tad-dinja.
Riformi fil-qasam tal-ġustizzja li kisbu t-tifħir ta’ għadd ta’ istituzzjonijiet barranin u deċiżjonijiet, diffiċli kemm huma diffiċli li ttieħdu.
Fuq kollox f’dawn l-erba’ snin inżergħet iż-żerriegħa għall-aktar ugwaljanza bejn is-sessi mhux biss fuq il-post tax-xogħol iżda anki fl-ogħla istituzzjoni tal-pajjiż.
L-ambjent kien qasam li pajjiżna diġà beda jaqdef fosthom bit-tneħħija tal-plastik użat ta’ darba u miri ambizzjużi oħra fosthom dwar l-użu tal-karozzi elettriċi u l-ħelsien mill-karbonju.
Fuq kollox dan il-Gvern kompla jinvesti fin-nies.
Qed ikompli jaħdem fuq it-titjib tal-konnettività bejn iż-żewġ gżejjer, ikompli jbiddel u jifhem ir-realtajiet tal-familji tal-lum, bħall-bidliet fil-liġi tad-divorzju u r-riforma proposta fil-liġi tal-kannabis u jħares lejn l-innovazzjoni bħala għodda għan-negozji li bir-reżiljenza, l-għajnuna tal-Gvern bħal Covid Wage Supplement u l-bżulija tagħhom qed iħarsu lejn l-irkupru mill-pandemija.
Gvern immexxi minn Robert Abela li mhux iħares lura iżda ’l quddiem biex ilesti lil Malta għal għada, dik l-għada fejn pajjiżna jimraħ f’orizzonti ġodda u jkompli jikber fil-prosperità ġdida.
