L-Iskwadra ta’ Kontra d-Droga tal-pulizija Maltija arrestat erba’ persuni b’rabta ma’ sejba kbira tad-droga li tlaħħaq il-wieħed u għoxrin kilo droga suspettata kannabis.
Fi stqarrija l-pulizija qalet li din id-droga ġġib valur fit-triq ta’ erba’ mija u għoxrin elf ewro u s-sejba tad-droga saret wara żewġ operazzjonijiet fl-aħħar sigħat fil-Floriana u San Pawl il-Baħar.
Il-pulizija spjegat li wara diversi ġimgħat t’osservazzjoni, ilbieraħ għal ħabta tas-sitta ta’ filgħaxija ċċirkondat vann fil-Floriana li fih kien hemm żewġt irġiel, Malti ta’ sebgħa u erbgħin sena residenti l-Isla u Taljan ta’ tnejn u tletin sena residenti San Pawl il-Baħar.
Minn tfittxija li saret fil-vann, instabu żewġ kaxxi ssiġillati, waħda b’fridge u oħra b’chest freezer, u malli l-pulizija fetħuhom sabu għoxrin pakkett b’sustanza aktarx droga kannabis.
Il-ħidma b’rabta mal-operazzjoni fil-Floriana tkompliet f’garaxx u f’dar f’San Pawl il-Baħar.
Mal-wasla tal-pulizija tar-Rapid Intervention Unit, żewġt irġiel Taljani, ta’ tlieta u għoxrin u disgħa u għoxrin sena, li kienu fuq il-post ippruvaw jaħarbu iżda twaqqfu u ġew arrestati.
Fil-garaxx instabu kaxxi simili ta’ dawk li nstabu fil-vann, u fid-dar instabet aktar sustanza ta’ droga kannabis.
Il-Maġistrat tal-Għassa Dr Gabriella Vella ġiet infurmata bil-każ u ħatret inkjesta filwaqt li l-persuni arrestati mistennija jitressqu l-Qorti fil-jiem li ġejjin.
Ritratti: Uffiċċju tal-Komunikazzjoni, Il-Korp tal-Pulizija ta’ Malta.
