Gudja Utd u Balzan qasmu l-punti u erba’ goals biex ħadu punt kull wieħed għal riżultat li ma kkuntenta lill-ebda team. Gudja li dehru l-aħjar għal ħafna ħin baqgħu ma rnexxielhomx jirreġistraw l-ewwel rebħa waqt li Balzan kienu mistennija jagħtu wirja ferm aħjar milli fil-fatt taw f’din il-logħba.
L-ewwel taqsima kienet pjuttost kwieta bi ftit li xejn azzjonijiet perikoluzi. Balzan heddew ftit aktar meta kienu qed jilgħabu favur ir-riħ, tant li kellhom l-ewwel tentattiv għal-lasta jasal fid-9 minuta permezz ta’ Da Silva Souza li x-xutt tiegħu ġie salvat tajjeb mill-goalkeeper Justin Spiteri. Tliet minuti wara l-istess Da Silva Souza nkariga ruħu minn freekick li ġie salvat għal darb’oħra minn Spiteri.
F’azzjoni iżolata, Gudja kellhom freekick mogħti minn Matias Muchardi fid-19-il minuta jgħaddi ftit barra. L-aħħar azzjoni ta’ l-ewwel taqsima waslet fil-45 minuta fejn Balzan resqu qrib permezz ta’ xutt ta’ Marcus Grima li l-goalkeeper Spiteri salva f’żewġ tentattivi.
It-tieni taqsima bdiet bil-Gudja fuq l-attakk tant li fit-48 minuta huma marru fil-vantaġġ meta ngħataw penalty għal foul fil-kaxxa ta’ Nikola Zerjal fuq Neil Tabone. Mill-11-il metru Abou Toure ma falliex.
Balzan ippruvaw iwettqu reazzjoni u fit-52 minuta kien il-goalkeeper Spiteri li mblokka tajjeb ix-xutt ta’ Peter Olawale. Fid-59 minuta azzjoni perikoluza oħra ta’ Balzan intemmet bix-xutt ta’ Aleksa Andrejic jiġi salvat minn Spiteri.
Balzan kisbu l-goal tad-draw fil-71 minuta meta l-goalkeeper Spiteri salva imma ma żammx xutt ta’ Da Silva Souza, biex mir-rebound kien is-sostitut Jake Grech li tefa’ fix-xibka biex għamel l-iskor indaqs.
Ħames minuti wara Balzan kienu viċin li jerġgħu jiskurjaw imma Jake Grech naqas li japprofitta wara żball rari tal-goalkeeper Spiteri. Sekondi biss wara n-naħa l-oħra Gudja reġgħu marru fil-vantaġġ meta Abou Toure għadda ballun lil Matias Muchardi li minn qagħda tajba barra l-kaxxa l-kbira fajjar xutt fil-baxx li spiċċa fir-rokna tax-xibka.
Iżda l-iskor rega’ sar indaqs fid-89 minuta meta Balzan ingħataw penalty għal foul fil-kaxxa ta’ Armando Melo fuq Dimeji Awosanya. Inkariga ruhu mill-penalty Da Silva Souza li l-ewwel xutt tiegħu ġie mblukkat mill-goalkeeper Spiteri imma mir-rebound ma falliex.
Fil-91 minuta keċċa lill-Mamcilo Raso ta’ Balzan għal foul barra l-kaxxa bil-free-kick sussegwenti eventwalment ma’ jwassal għal ebda periklu.
Referee: Matthew Degabriele
Plejer tal-Loghba: Justin Spiteri (Gudja Utd)
