Emmanuel Macron jirbaħ ħames snin oħra ta’ tmexxija fi Franza… iwiegħed li se jkun “President ta’ kulħadd”

Emmanuel Macron rebaħ ħames snin oħra ta’ tmexxija fi Franza wara rebħa konvinċenti fl-elezzjoni Presidenzjali fuq ir-rivali tiegħu Marine Le Pen, li minkejja t-telfa, xorta rnexxielha tikseb l-ikbar ammont ta’ voti għal-lemin estrem.
Macron rebaħ b’aktar minn tmienja u ħamsin fil-mija tal-voti, li huwa ferm iktar minn dak li kien imbassar. Min-naħa tagħha, Le Pen kisbet ftit aktar minn wieħed u erbgħin fil-mija.
Il-President Franċiż indirizza lill-partitarji biswit it-Torri Eiffel f’Pariġi ftit wara r-riżultat, u wiegħed li se jkun “President ta’ kulħadd”.
Dan ir-riżultat jagħmel lil Macron l-ewwel President f’għoxrin sena li reġa’ ġie elett.
Minkejja t-telfa tagħha, Le Pen li għandha tlieta u ħamsin sena, qalet li l-vot sinifikanti tagħha xorta jimmarka rebħa.