Kmieni l-Ġimgħa filgħodu, baħar ta’ nies u żgħażagħ inġabru għall-istess għan u mal-ewwel tokki ta’ nhar il-Ġimgħa l-Kbira, imxew mill-Mellieħa sal-Furjana.
Dan għat-tmintax-il edizzjoni tal-mixja ta’ Puttinu li ta’ kull sena tiġbor komunitajiet kbar ta’ nies minn madwar il-pajjiż għal dan l-għan nobbli.
Fil-fatt, fl-edizzjoni ta’ din is-sena, ħadu sehem madwar għaxart elef persuna għall-mixja b’risq il-Fondazzjoni Puttinu Cares.
Din is-sena, il-mixja bdiet mill-Pjazza tas-Santwarju, il-Mellieħa u spiċċat fuq il-Fosos, il-Furjana.
B’kollox dawk kollha li rnexxielhom jwasslu sal-aħħar, imxew 17-il kilometru u għaddew mix-Xemxija, San Pawl il-Baħar u l-Pjazza tal-Mosta. Il-mixja baqgħet sejra lejn iċ-ċimiterju ta’ Ħal Lija, Wied ta’ Birkirkara, Wied tal-Imsida u għaddiet mix-Xatt tal-Pietà u waqfet il-Furjana.
Bħal kull sena, il-flus li jinġabru jmorru għand Puttinu Cares, bil-għan li jgħinu biex tittaffa ftit mit-tbatija ta’ tant pazjenti Maltin li jkollhom jirrikorru għall-kura barra minn xtutna.
Minbarra l-eluf ta’ Maltin u Għawdxin li attendew, għexieren ta’ persuni ħadmu minn wara l-kwinti biex ħadu ħsieb din l-attività. Fost dawn in-nies kien hemm uffiċjali ta’ Transport Malta u pulizija f’kull distrett biex iżommu l-ordni u jħarsu l-parteċipanti minn kull periklu li jistgħu jiltaqgħu miegħu fit-triq.
Intant tul il-jum tal-ġimgħa komplew jinġabru aktar fondi waqt maratona ġbir ta’ fondi speċjali li qed tixxandar b’mod dirett fuq l-istazzjonijiet kollha inkluż ONE.
