Eluf ta’ Maltin u Għawdxin qegħdin jikonkorru għas-sejħa tad-Dar tal-Providenza waqt il-maratona ġbir ta’ fondi ‘Festa ta’ Ġenerożità’.
Din il-maratona se tkun qed tgħin fl-ispejjeż li ta’ kuljum ikollha din id-dar, li tilqa’ fiha mija u ħmistax-il persuna, filwaqt li tgħin ukoll biex tkompli tiġġedded u tkun ta’ servizz lejn is-soċjetà Maltija billi toffri ambjent inklussiv lil persuni b’diżabbiltà.
Fl-ewwel sigħat tal-maratona, li saret appuntament annwali fil-kalendarju lokali, dan l-istazzjon żar id-Dar tal-Providenza fis-Siġġiewi minn fejn tixxandar din il-maratona.
Hemmhekk tkellimna mad-Direttur ta’ din id-dar Fr Martin Micallef li qasam magħna l-għanijiet li għandha din id-dar għal matul is-sena li għadha kif bdiet.
“Dawn il-flus ukoll se jmorru biex nirriġeneraw erba’ appartamenti li għandna f’Villa Papa Ġovanni biex nagħmluhom aktar ambjent dinjituż fejn jgħixu dawn il-persuni. Se nkunu qed niftħu dar oħra fil-komunità u anke nagħtu t-taħriġ lill-ħaddiema biex ikollna l-ogħla kwalità ta’ servizz mistħoqq minn entità bħal tagħna.”
Tul il-maratona fid-Dar tal-Providenza segwejna andament mill-isbaħ fosthom b’għexieren ta’ persuni li jagħżlu li jagħtu d-donazzjoni tagħhom b’mod personali.
Uħud minn dawn qalulna għalfejn jattendu u joffru l-appoġġ tagħhom lil din id-dar bħala voluntiera jew donaturi.
“Jiena hawnhekk niġi biex ngħin, ilni niġi minn kważi meta bdiet is-sena, li ngħin. Nieħu sodisfazzjon kbir.”
“Id-Dar tal-Providenza b’dawn l-affarijiet timxi hu.”
“L-ewwel ħaġa hija kawża tajba hu, jiena kont impjegat hawnhekk ukoll allura qalbi marbuta ma’ hawnhekk u niġi nagħti s-sehem tiegħi ukoll. Inħeġġeġ lin-nies biex jiġu jagħtu għax hija kawża verament tajba.”
“Hawnhekk aħna kull sena niġu ngħinuhom, aħna.”
“Qalbna dejjem marbuta ma’ din id-dar u l-ammont ta’ flus li nġemmaw matul is-sena, li nistgħu inwarrbuhom u niġu nagħtuhom hawnhekk.”
Il-maratona li qed tixxandar fuq l-istazzjon ONE, fost l-oħrajn, għandha għaddejja sa nofsillejl bl-appell ikun dak li l-poplu Malti u Għawdxi jkun ġeneruż ma’ din id-dar li taħdem mill-qrib ma’ għexieren ta’ persuni b’diżabbiltà matul is-sena kollha.
Fr Martin stqarr, “Nappella lil poplu Malti u Għawdxi li qiegħed jismana biex jagħti d-donazzjoni tiegħu u hekk isostni l-ħidma, ħalli nkomplu nirrealizzaw il-ħolma li kellu l-fundatur tagħna Dun Mikiel Azzopardi li joffri dan it-tip ta’ servizz lil dawk li jkollom bżonnu.”
Fost id-donazzjonijiet, il-Ministru Owen Bonnici f’isem il-Gvern ippreżenta s-somma ta’ ħamsa u għoxrin elf ewro mill-Fond għall-Kawżi Ġusti.
Min-naħa tagħha, il-Ministru għall-Inklużjoni, il-Volontarjat, u d-Drittijiet tal-Konsumatur, Julia Farrugia Portelli, ħabbret li fix-xhur li ġejjin se tinfetaħ dar ċkejkna fil-komunità biex numru żgħir ta’ persuni b’diżabilità jkunu jistgħu jgħixu ħajja indipendenti.
