Kienu l-eluf li, is-Sibt filgħaxija, irħewlha għall-Fosos tal-Furjana għall-kunċert Rock Anthems, tal-BBC Orchestra.
Kien lejl mżewwaq b’innijiet u kanzunetti magħrufin ta’ rock klassiku u diski pop, li kkonsistew f’madwar għoxrin kanzunetta li jippreżentaw l-aqwa u l-ifjen elementi ta’ artisti bħall-Queen, Michael Jackson, il-Beatles, Coldplay, u Tina Turner.
Kanzunetti oħra kienu The Wonder of You ta’ Elvis Presley, Stairway to Heaven tal-Led Zeppelin, u Space Oddity ta’ David Bowie.
Fost l-atti kien hemm 23 student tal-Malta Visual and Performing Arts, li żifnu mal-kanzunetta popolari ‘Another Brick in the Wall’ tal-grupp Pink Floyd.
Dawn l-istudenti kienu lebsin uniformi żmattata ħalli jkunu mat-tema ta’ din il-kanzunetta.
Il-preparamenti għal din iż-żifna kienu diversi, sabiex dawn l-istudenti paxxew lil dawk li attendew għal dan il-kunċert
Il-Kunċert mill-orkestra tal-BBC kien it-tielet wieħed tat-tip tiegħu li sar f’pajjiżna, u se jkun qed jinstema fuq il-BBC Radio 2, li huwa l-aktar radju segwit fl-Ewropa.
Kienu bosta li faħħru l-kunċert, li kien wieħed organizzat b’reqqa. Dawn rrimarkaw li l-kunċert kien mistenni ferm għax kien it-tieni wieħed li sar bħalma kienu jsiru qabel il-pandemija, wara dak ta’ Lewis Capaldi.
L-orkestra tal-BBC għalqet dan il-kunċert permezz tad-daqq tal-innu Malti.
L-Awtorità Maltija tat-Turiżmu u Visit Malta kienu strumentali biex dan il-kunċert seta’ jsir.
