Quddiem folla sabiħa b’ħafna ilwien bojod u ħomor u entużjażmu għall-kampanja pożittiva li beda l-Partit Laburista, il-Prim Ministru u Mexxej Laburista Robert Abela qal li l-Partit Laburista għandu pjan b’elf proposta għall-futur ta’ pajjiżna.
“Dil-ġimgħa ħabbarna ħames proposti ewlenin. Però għadna lanqas bdejna. Għandna pjan settur, settur. Pjan b’elf proposta għall-futur ta’ pajjiżna. Minn mitt idea wellidna elf proposta li nibtu minn fostkom. U lesti nisimgħu iktar.”
Il-Prim Ministru u Mexxej Laburista Robert Abela
Fit-Rally Team Malta fin-Naxxar, il-Prim Ministru tenna l-importanza li dan il-pjan jiġi spjegat lill-poplu tul din il-kampanja elettorali sabiex tingħata stampa ċara tal-futur ta’ pajjiżna.
Hawn il-Prim Ministru fakkar fl-ewwel ħames proposti ewlenin li ħabbar il-Partit Laburista u li jinkludu fost l-oħrajn l-allokazzjoni ta’ €700 miljun fuq perjodu ta’ seba’ snin favur proġetti ħodor u spazji miftuħa fil-qalba tal-irħula Maltin u Għawdxin.
Dan flimkien ma’ dik li se tkompli tnaqqas il-ħlas ta’ taxxi lil dawk bi dħul baxx.
“Jibqa’ ħaj għalhekk il-prinċipju li min jiflaħ l-anqas, ngħinuh l-aktar. Dawk bi dħul baxx u l-middle class insostnuhom l-aktar. Il-prinċipju ta’ ġustizzja soċjali se jibqa’ ħaj. U bħalma nħobbu lill-ħaddiema, daqstant ieħor inħobbu lill-pensjonanti tagħna. U għalhekk, jekk tagħtuna l-fiduċja, il-ħames snin li ġejjin se jkunu l-ħames snin bl-ikbar żidiet fil-pensjonijiet. Qed inwiegħdu d-doppju ta’ dak li wiegħdna fl-aħħar ħames snin.”
Il-Prim Ministru u Mexxej Laburista Robert Abela
Filwaqt li kompla jfakkar fil-proposti ewlenin l-oħra li jinkludu l-għajnuna lill-First Time Buyers, b’€10,000 għal xiri ta’ propjeta b’self u aktar żidiet, il-Prim Ministru saħaq xorta li dan il-Gvern se jinvesti fin-nies u mhux jimponi awsterità bħal ma għamlu Gvernijiet Nazzjonalisti.
“Ftakru x’ġara meta dan il-pajjiż kellu Gvern maqsum u bla direzzjoni. Daħħluna f’riċessjoni u biex ippruvaw isolvuha, tefgħu fuqkom il-piż tal-kontijiet. Aħna minflok dħalna f’riċessjoni ninsabu ħerġin minn pandemija bi tkabbir ekonomiku b’saħħtu. Bl-anqas qgħad fl-istorja.”
Il-Prim Ministru u Mexxej Laburista Robert Abela
Dr Abela rrefera wkoll lejn l-inqas rata ta’ qgħad li rreġistra pajjiżna fl-istorja anki waqt pandemija u b’ton ta’ għaqda u ta’ mexxej li jħares lejn futur isbaħ għal pajjiżna, semma kif Malta għandna żminijiet sbieħ quddiemha.
“Din il-ġimgħa reġa’ kellna l-aqwa konferma tas-suċċess tal-politika ekonomika tagħna. Fi tmiem Jannar kellna biss 1,117 il-persuna jirreġistraw. L-anqas qgħad fl-istorja. Dak huwa r-riżultat meta jkollok Malta Flimkien. Lanqas pandemija ma waqqfet lil Team Malta. Aħseb u ara x’nistgħu niksbu jekk nibqgħu naħdmu flimkien.”
Il-Prim Ministru u Mexxej Laburista Robert Abela
Bin-nies ottimisti quddiemu fin-Naxxar, il-Prim Ministru Robert Abela tenna l-għajta ta’ Malta Flimkien.
“Għax Malta Flimkien se nagħtukom ambjent isbaħ. Malta Flimkien se nkomplu nkabbru l-ġid ta’ pajjiżna. Malta Flimkien se nagħtu ħajja aħjar lill-anzjani tagħna. Malta Flimkien iż-żgħażagħ se jwettqu l-aspirazzjonijiet tagħhom. Malta Flimkien il-familji se jkollhom spalla akbar. Malta Flimkien se nibqgħu kburin b’pajjiżna. Malta Flimkien. Il-futur sabiħ.”
Il-Prim Ministru u Mexxej Laburista Robert Abela
