“It-tkabbir ekonomiku għandu jibqa’ jintuża biex intejbu l-kwalità tal-ħajja tas-soċjetà Maltija.”
Dan intqal mill-eks President u Direttur tal-Unjin Ħaddiema Magħqudin, Jesmond Bonello, f’kitba ta’ opinjoni fuq il-gazzetta KullĦadd, fejn sostna li mingħajr tkabbir ekonomiku, l-għajnuna u l-assistenza li jagħti l-Gvern ma tistax tkun possibbli.
Bonello fakkar li fil-pandemija, kieku ma kienx hemm ekonomija b’saħħitha, il-pajjiż ma kienx ikun f’qagħda li joffri l-vaċċin b’xejn lil kulħadd. Saħaq li kieku l-Gvern ma jkunx jista’ jassisti lil min iħaddem, lill-ħaddiema u lill-familjari tagħhom b’mod finanzjarju. Huwa qal li dan huwa bil-kontra ta’ dak li seħħ f’pajjiżi oħra, fejn mhux biss ma ngħatawx assistenza, iżda saħansitra tilfu l-għajxien tagħhom.
L-eks President tal-UĦM semma wkoll il-gwerra fl-Ukrajna, fejn qal li “mingħajr ekonomija b’saħħitha ma kienx ikun possibbli li jkollna enerġija u fuel tal-karozzi tagħna ssussidjati.” Sostna li kieku ma seħħx dan apparti l-inflazzjoni, kien ikun hemm żieda fil-kontijiet tad-dawl, bħalma ġara f’pajjiżi oħra Ewropej.
Bonello rrimarka li l-unika riżorsa li għandu pajjiżna hija tal-ħaddiema u hawn innota li fl-aħħar ħdax-il sena, ir-rata tal-qgħad f’pajjiżna niżlet bin-nofs, għal inqas minn 3% – li fl-ekonomija tfisser li prattikament il-qgħad huwa kważi ineżistenti.
Qal ukoll li fl-aħħar snin, is-setturi tal-manifattura, tat-turiżmu tal-kostruzzjoni u servizzi oħra żdiedu, waqt li kumpaniji fis-setturi tal-igaming u s-servizzi finanzjarji qed ikabbru l-operat f’pajjiżna.
Jesmond Bonello qal li jekk niddeċiedu li nabbandunaw din is-sistema li qed twassal għal tkabbir ekonomiku b’saħħtu, u jingħalqu xi setturi li jiddependu mill-ħaddiema, ikun ifisser “suwiċidju għal pajjiżna.”
Qal li bħala pajjiż irridu nkomplu nsaħħu l-infrastruttura biex tkompli tagħmel tajjeb għall-isfidi tal-futur.
Sostna li l-investiment li qed jiġi ppjnanat mill-Gvern permezz ta’ interconnector ieħor u pjattaforma fil-baħar ta’ diversi pannelli solari u turbini tar-riħ se jkompli jsaħħaħ il-provvista tal-enerġija rinnovabbli.
B’dan jingħaqad ma’ kullana ta’ riformi u investimenti biex pajjiżna jkompli miexi ’l quddiem.
