Permezz tal-Budget għas-sena d-dieħla, il-Gvern se jkun qed jinvesti aktar minn sittin miljun ewro fis-settur kulturali.
Ħabbar dan il-Ministru għall-Wirt Nazzjonali, l-Arti u l-Gvern Lokali Owen Bonnici f’konferenza tal-aħbarijiet bit-tema ‘Malta Ċertezza u Stabbiltà’.
Fil-Valletta Design Cluster, il-Ministru Bonnici qal kif fi ftit xhur oħra, il-Gvern se jgħaddi lura lill-poplu l-proġett MICAS, li huwa mmirat biex jitwassal il-messaġġ dwar l-arti kontemporanja fiż-żona tas-swar ta’ San Salvadur fil-Furjana.
L-investiment massiċċ, qed isir f’fażijiet differenti fuq medda ta’ 12-il tomna ta’ art li ma kinitx aċċessibbli jew kienet mitluqa.
Qal, “Is-sena d-dieħla hu ppjanat li jitlestew il-galleriji tal-arti, sbieħ immens ta’ iktar minn tlett elef metru kwadru ta’ spazji interni u l-ġnien tal-iskultura b’investiment li jlaħħaq €14-il miljun. Imbagħad jitkompla x-xogħol fuq il-fażijiet l-oħra b’investiment addizzjonali ta’ €4 miljun. Infakkar li diġa’ ntefqu €3 miljuni oħra fir-restawr tas-swar.”
Fl-istess konferenza, il-Ministru nieda mill-ġdid l-Culture Pass, li tagħti esperjenza kulturali u artistika lill-istudenti Maltin u Għawdxin.
Hawnhekk intqal kif tul l-aħħar ħames snin, ittellgħu 171 produzzjoni li ġew murija lil mija u ħamsa u ħamsin elf, disa’ mija u erbgħa u erbgħin student. Fix-xhur li ġejjin hemm imħejjija sitta u erbgħin proġett ieħor.
Is-sena d-dieħla se jiġu allokati aktar minn tliet miljun Ewro fondi kapitali biex tkun tista tkompli titwettaq il-ħidma ta’ restawr f’diversi lokalitajiet, bi pjanijiet ta’ ħamsa u għoxrin proġett ieħor li għandhom jibdew fix-xhur li ġejjin.
Fosthom is-sur tal-Marina fil-Belt, il-Knisja tal-Ġiżwiti, il-Knisja ta’ Ġieżu fil-Belt, il-Kappella tal-Lunzjata fis-Siġġiewi, il-Palazz tal-Gran Mastru, il-proġett f’Tas-Silġ, Villa Guardamangia u l-Victoria Lines.
Il-Gvern qed jinvesti mill-ġdid b’aktar minn seba’ miljun ewro sabiex jitjieb ix-xandir nazzjonali.
Il-Kunsill Malti għall-Arti se jibqa’ jniedi skemi finanzjarji, fosthom għall-għaqdiet volontarji muzikali u l-għaqdiet tal-armar u n-nar fl-ibliet u l-irħula ta’ pajjiżna.
B’allokazzjoni ta’ ħames miljun ewro, ser tissokta l-produzzjoni ta’ kalendarju ta’ festivals ta’ kwalità fil-ġeneri differenti. Permezz ta’ dawn il-festivals qed ikun hemm aktar minn 250 attivita fil-kalendarju kulturali Malti li joffru opportunitajiet varji lil aktar minn 3,000 artist Malti.
Il-Ministru Bonnici tkellem ukoll dwar l-investiment kulturali fil-Belt Valletta u spjega li dan se jkompli b’allokazzjoni ta’ aktar minn tliet miljuni u nofs ewro, b’avvenimenti bħal Opri, Festivals Ambjentali u Gastronomiċi, istallazzjonijiet artistiċi, u attivitajiet oħra li jolqtu l-gosti ta’ kulħadd.
Għall-ewwel darba fl-istorja ta’ pajjiżna, Malta se tieħu sehem fil-London Design Biennale, filwaqt li l-ħidma għall-parteċipazzjoni ta’ Malta fil-Biennale ta Venezia għall-edizzjoni li jmiss se tibqa’ għaddejja.
