Se tkun qed tinħareġ sejħa ta’ kwart ta’ miljun ewro sabiex għaxar binjiet tal-Gvern jiġu mgħammra b’pannelli fotovoltajiċi, b’kull applikazzjoni għas-sejħa se tilħaq il-massimu ta’ madwar ħamsa u għoxrin elf ewro.
Il-Ministru Miriam Dalli spjegat kif din l-inizjattiva kompli tħeġġeġ l-użu ta’ enerġija rinovabbli hekk kif il-Gvern għandu d-dmir li jmexxi bl-eżempju f’dan il-qasam.
Dr Dalli sostniet kif dan l-impenn tal-Gvern mhux biss se jgħin għad-dekarbonizazzjoni ta’ Malta, iżda tgħin ukoll biex tnaqqas id-dipendenza fuq sorsi tal-enerġija li mhumiex rinovabbli.
Il-Ministru qalet, “B’dan l-investiment qiegħdin naraw li nkunu nistgħu ninvestu f’minn tal-inqas għaxar proġetti differenti fuq binjiet tal-Gvern, biex anke dawn il-binjiet tal-Gvern ikunu qed jgħinu ħalli jkollna aktar sorsi t’enerġija rinovabbli. Ifisser li jkollna enerġija aktar nadifa, u jfisser ukoll li jkollna enerġija bi prezz ħafna iktar orħos anke għall-binjiet tal-Gvern.”
Il-Ministru Miriam Dalli stqarret ukoll kif din l-inizjattiva hija xhieda li l-Gvern qed jindirizza t-tibdil fil-klima filwaqt li jassigura stabbilità fis-sorsi tal-enerġija.
Intant il-Kap Eżekuttiv tal-Aġenzija għall-Enerġija u l-Ilma, Manuel Sapiano, qal kif din l-inizjattiva hija biss parti minn kullana ta’ proġetti favur l-użu ta’ enerġija rinovabbli.
Sapiano tenna, “Din il-miżura tikkumplimenta inizjattivi oħra li s-settur pubbliku qed jieħu bħal dak ta’ remote working u dawk għal trasport intelliġenti sabiex b’hekk jagħmel l-operat tiegħu iktar sostenibbli u jgħin lill-pajjiż jilħaq it-tragwardja tiegħu għall-elfejn u tletin”
Din l-inizjattiva se tkun qed tolqot ukoll tliet miri tal-Ġnus Magħquda għall-Iżvilupp Sostenibbli, u għalhekk Ministeri, Dipartimenti tal-Gvern u entitajiet pubbliċi huma kollha mħeġġa sabiex japplikaw għal din l-inizjattiva.
