Is-sena l-oħra, waqt li l-pandemija ġabet lil diversi ekonomiji madwar id-dinja għarkupptejhom, Malta ġġenerat mal-mija u ħamsa u għoxrin miljun ewro mill-programm ta’ residenza.
Dan ħabbru s-Segretarju Parlamentari għaċ-Ċittadinanza Alex Muscat, li fil-Parlament ta rendikont qasir ta’ kif intefaq ftit mill-ġid iġġenerat minn dan il-programm.
Huwa sostna li dan in-numru mhuwiex wieħed insinifikanti meta wieħed jiftakar fil-limitazzjonijiet tal-ivjaġġar li ddominaw is-sena l-oħra.
L-Onor. Alex Mucat qal, “Is-sena li għaddiet, li kellek limitazzjonijiet kbar fuq safar, xorta waħda minn dawn l-inizjattivi u l-programmi għaddejna b’mod dirett fil-fond konsolidat, li huwa litteralment il-kont tal-Gvern li minnu jintuża għan-nefqiet kollha li jkollu bżonn il-Gvern, xejn inqas minn mija u ħamsa u għoxrin miljun ewro.”
Fost il-proġetti li saru f’din is-sena biss frott tal-miljuni kbar iġġenerati minn dan il-programm, is-Segretarju Parlamentari semma ċ-ċentru tal-podjatrija f’Birkirkara, b’investiment ta’ xejn inqas minn mitejn elf ewro.
Apparti minn hekk, ġew investiti mal-mija, ħamsa u sittin elf ewro f’faċilitajiet edukattivi fosthom laboratorju u librerija f’ħames skejjel Maltin
Huwa spjega wkoll kif ġew investiti mal-mitt elf ewro f’rinovar ta’ niċċa storika fis-Saqqajja fir-Rabat.
Intant, is-Segretarju Parlamentari sostna kif fl-ewwel ftit xhur ta’ din is-sena, il-programm ta’ residenza diġa ġġenera ammont sostanzjali ta’ ġid.
Huwa tenna: “F’din is-sena s’issa mill-programm ta’ residenza ġġenerajna iktar minn ħamsin miljun ewro. Biex inkun preċiż din iċ-ċifra li qed ngħid hija sa numru ta’ ġimgħat ilu.”
Fil-Parlament, Alex Muscat temm id-diskors tiegħu billi nnota li dawn l-investimenti fil-komunità Maltija huma r-raġuni għalfejn Malta se tkompli tiddefendi d-dritt li tuża dawn il-programmi biex tkompli ttejjeb il-kwalità ta’ ħajja tal-Maltin.
