Il-Viċi Kap Nazzjonalista Robert Arrigo waħħal f’diversi msieħba li għenu jiffurmaw id-dokument ta’ qabel il-Budget tal-Partit Nazzjonalista għall-iżbalji kbar li fih.
Il-ġimgħa li għaddiet il-Partit Nazzjonalista nieda d-dokument tiegħu ta’ qabel il-budget fejn spikkaw żbalji kbar fiċ-ċifri f’partijiet differenti fl-istess dokument.
Fost oħrajn stajna ninnutaw kif f’paġna 18 tad-dokument jingħad li fl-ewwel kwart tas-sena kien hemm tkabbir ekonomiku ta’ 1.4%.
Madankollu f’paġna 9, l-istess dokument jgħid li t-tkabbir kien tliet darbiet inqas, jiġifieri 0.5%.
F’paġna 10 tad-dokument il-Partit Nazzjonalista jgħid li t-tkabbir ekonomiku reali fl-2019 kien ta’ 4.7%.
Madankollu meta tqalleb ftit paġni wara l-Partit Nazzjonalita jgħid li t-tkabbir ekonomiku reali fl-2019 kien ta’ 4.9%.
Dwar dawn l-inkonsistenzi staqsejna lil Robert Arrigo u Therese Comodini Cachia sabiex jiċċaraw liema ċifra hija waħda korretta u Arrigo farfar ir-responsabbiltà fuq min għen lill-Partit Nazzjonalista joħroġ dan id-dokument.
Ġurnalist ta’ ONE News staqsa, “Dwar din il-mistoqija għax Dr. Comodini Cachia ma rrisponditnix. Żewġ ċifri differenti fuq l-istess ħaġa. 4.9% u 4.7%. Liem hi t-tajba?”
Arrigo wieġeb, “Interessanti li ħa tkompli tisħaq fuq din. Kull ċifra hija magħmula minn stakeholders. Stake holders għandhom ukoll diversi metodi fejn jaslu.”
Lil Robert Arrigo staqsejnih dwar l-estensjoni tal-miżura tal-għajnuna fil-ħlas tal-pagi hekk kif il-Partit Nazzjonalista nkludiha fid-dokument ta’ qabel il-Budget tiegħu.
Huwa qal li l-Prim Ministru qed jirrepeti dak li qed jgħid il-Partit Nazzjonalista.
Il-ġurnalist kompla jistaqsi, “Il-Gvern għidtu li għandi jestendi l-Wage Supplement sa Marzu. Tafu li din il-Prim Ministru diġà ħabbarha din il-miżura u għidtu wkoll li għandhom jidħlu skemi biex jiġu rranġati l-faċċati tad-djar. Din l-iskema ilha teżisti u din is-sena reġgħet ġiet estiża. Qed tirrepetu affarijiet li diġà qegħdin hemmek?”
“Naħseb il-Prim Ministru qiegħed jirrepeti dak li aħna ilna ngħidulu.” Qal Arrigo.
Madankollu kien il-Prim Ministru nnifsu li fis-27 ta’ Settembru, kważi ġimagħtejn qabel il-Partit Nazzjonalista ħareġ id-dokument, li ħabbar li ser jestendi din il-miżura.
Dr Abela kien ħabbar, “Il-Covid Wage Supplement salva mitt elf impjieg b’mod dirett u indirett. Ħa nagħti aħbar. Dak il-Covid Wage Supplement ser jibqa’ u mhux ser jibqa’ sal-aħħar ta’ Ottubru imma ser jiġi estiż.”
Hawnekk Robert Arrigo kompla bin-narattiva negattiva li qabad il-Partit Nazzjonalista mmexxi minn Bernard Grech u skont hu saħaq li bis-sulluzzu ma naslu imkien.
Dan minkejja li l-Prim Ministru estenda l-Covid Wage Supplement b’mod indefinit.
“Ilna xhur ngħidulu li bis-sulluzzu m’aħna ser naslu imkien. Xahar b’xahar ma tasal imkien.” Qal Arrigo.
