Il-Partit Nazzjonalista ikkonferma li qed iġib it-tribaliżmu politiku qabel is-saħħa tal-istudenti u l-għalliema f’pajjiżna.
Dan ġie kkonfermat f’konferenza tal-aħbarijiet dwar il-ftuħ mill-ġdid tal-iskejjel fejn kandidat Nazzjonalista stqarr kif il-Partit Nazzjonalista m’għandux l-irwol li jgħaddi l-proposti.
Qal, “Il-Partit Nazzjonalista għandu idea tajba tal-proposti li jrid iressaq imma fl-aħħar mill-aħħar kif qalu tajjeb il-kollegi tiegħi, mhux kompitu tagħna li f’dan l-istadju nagħtu il-proposti tagħna lil Gvern biex imbgħad kif ġara anke f’mumenti oħrajn joħodhom tiegħu u jirkeb fuq il-karru hu.”
Fl-istess konferenza tal-aħbarijiet il-kandidata Nazzjonalista Julie Zahra qalet ukoll li la l-Partit Nazzjonalista qiegħed fl-Oppożizzjoni dan m’għandux jipproponi iżda jillimita ruħu għall-kritika.
Dan filwaqt li meta mistoqsija dwar x’qed jgħid il-Covid Team tal-Partit Nazzjonalista hija ma kinitx taf kif twieġeb.
Spjegat, “Rigward proposti tagħna, aħna m’aħniex fil-Gvern. Rigward il-Covid Strategy Team dak inħalli f’idejn Clyde li huwa parti mill-grupp tal-Covid Strategy Team u ħarġu wkoll bi proposti.”
Imbagħad qam biex iwieġeb Clyde Puli, li nfexx biss jattakka lill-ġurnalist wara li dan tal-aħħar staqsa jekk il-Covid Team li tant ftaħar bih il-Kap Nazzjonalista Bernard Grech kienx qed jiltaqa’.
Waqt dawn l-attakki, il-Partit Nazzjonalista, li tant jitkellem fuq il-libertà tal-espressjoni u l-protezzjoni tal-ġurnalisti, lill-ġurnalist neħħielu kull opportunità li jagħmel mistoqsija supplimentari billi nqata’ l-mikrofonu tas-sistema online li qed tintuża biex biha l-ġurnalisti jsegwu l-konferenzi tal-aħbarijiet tal-Partit Nazzjonalista.
Spjega, “Tibqax tinsisti fuq gidba, din tal-Covid Team minn fejn ġibtha? Jiena ma jidhirlix li inti tkun mistieden biex tkun taf jekk jiltaqax jew le. Il-Covid team jitkellem regolarment kuljum. Li nibqgħu ngħidu li ma ltaqax u m’għamilx proposti naħseb li nkunu biss qed nirrepetu gidba.”
Madankollu, dak li Puli sejjaħ gidba kien ikkonfermat mid-Deputat Nazzjonalista Maria Deguara stess.
Dan wara li sa ftit tal-ġimgħat ilu, Deguara ħallietna bla risposta dwar meta l-aħħar iltaqa’ l-Covid Team tal-Partit Nazzjonalista.
Qalet, “Iltaqa’ riċentament il-Covid Team tal-Partit Nazzjonalista, ma tistax tgħidilna? Jew ilu ma jiltaqa’? Taħseb li spiċċat il-pandemija jekk ilu ma jiltaqa’ l-Covid Team tal-Partit Nazzjonalista. Għaliex diffiċli tweġibni Dr Deguara? Sempliċiment data. Forsi l-ġimgħa l-oħra, din il-ġimgħa, ġimagħtejn ilu? Ma tistax tgħidli meta?”
