Marsaxlokk u Naxxar Lions temmew il-konfront ta’ bejniethom fi draw ta’ mingħajr goals, f’partita iżda li fiha jekk kien hemm team li kellu joħroġ bi tliet punti m’hemmx dubju li dan kien kien Marsaxlokk hekk kif kienu huma li ddettaw il-logħob u ħolqu divesri azzjonijiet denji ta’ nota tul id-90 minuta, b’Naxxar ikunu perikolużi biss lejn tmiem il-partita.
Madankollu, huma regġħu sabu lill-goalkeeper ta’ Naxxar Matthias Debono f’veba mill-aqwa biex kompla jikkonferma staġun ferm pożittiv għalih.
Kienu Marsaxlokk li ħarġu fuq l-offensiva u fit-tliet minuta, Yuri De Jesus Messias kellu t-tentattiv tiegħu mill-viċin salvat tajjeb bi bravura mill-goalkeeper żagħżugħ ta’ Naxxar, Matthias Debono,.
Huma komplew fuq l-offensiva u ħames minuti wara Jose Ulises Arias kellu xutt minn taħt il-lasta salvat għal darb’oħra minn Debono.
Kulma jmur kompla d-dominju tax-Xlukkjari u fit-13-il minuta, freekick ta’ Leandro Aguirre intemm ftit għoli.
Marsaxlokk komplew bl-assedju fuq il-lasti avversarja u fid-29 minuta xutt ta’ Enmy Manuel Pena Beltre ġie mblukkat minn sieħbu stess fuq il-linja, Jai Quiotongo, li pprova jixxuttja lejn il-lasti avversarji iżda kellu t-tentattiv tiegħu imblukkat minn difensur ta’ Naxxar.
Fil-ftuħ tat-tieni taqsima, Marsaxlokk komplew bl-istess ritmu tal-ewwel waħda u fit-58 minuta Yuri de Jesus Messias kellu xutt b’saħħtu minn ġol-kaxxa li ħareġ l-aħjar ta’ Debono li salva bi bravura.
Huma komplew jippressaw u fit-73 minuta Yuri De Jesus Messias minn taħt il-lasta tefa’ inkredibbilment barra, b’Naxxar jeħilsuha ħafif.
Bl-assedju kontinwu fuq il-lasti avversarji, l-affarijiet komplew jikkomplikaw ruħhom għal Naxxar u fis-76 minuta spiċċaw jilagħbu b’10 players meta tkeċċa għalihm il-player Pedro Vitor Gualberto De Assis Barreto, wara li rċieva żewġ karti sofor fil-partita.
Naxxar ħolqu l-unika azzjoni denja nota fil-partita fil-ħin mizjud meta freekick stupend ta’ Caxambu ġie salvat b’mod daqstant ieħor stupend mill-goalkeeper ta’ Marsaxlokk, Marko Drobnjak.
L-iskor baqa’ ma nbidilx sa tmiem il-partita, biż-żewġ timijiet jieħdu punt kull wieħed.
Referee: Matthew DeGabrielle
Plejer tal-Logħba: Yuri De Jesus Messias (Marsaxlokk FC)
