F’partita li naqset milli tilħaq l-aspettattiva, Balzan u Marsaxlokk, temmew il-konfront ta’ bejniethom fi draw ta’ mingħajr goals.
Kien biss fil-35 minuta li waslet l-ewwel azzjoni denja ta’ nota b’Marsaxlokk ikunu huma li joħolqu l-periklu meta appellaw għall-penalty hekk kif xutt mid-distanza ta’ Yuri De Jesus Messias deher jaħbat ma’ id difensur ta’ Balzan, iżda r-referee Alex Johnson, ħalla l-logħob għaddej.
Fil-50 minuta, xutt mid-distanza ta’ Yuri De Jesus Messias, dejjem għal Marsaxlokk ġie salvat mingħajr wisq diffkultá mill-goalkeeper ta’ Balzan, Danilo Golovic.
Mas-siegħa logħob Balzan ħolqu l-ewwel periklu fil-logħba meta Triston Caruana kellu x-xutt b’saħħtu tiegħu minn pożizzjoni ideali jintemm għoli.
Ħames minuti wara, Yuri De Jesus Messias għal Marsaxlokk kellu x-xutt tiegħu mill-viċin devjat f’corner mid-difiża ta’ Balzan, bix-Xlukkajri jerġgħu jappellaw għall-penalty, wara li allegetament, Olivier Rommens, miss il-ballun b’idu fil-kaxxa.
Marsaxlokk tilfu ċans tad-deheb li jiskorjaw il-goal tar-rebħa fil-85 minuta meta s-sostitut Anthony Obonogwu xeħet cross fil-baxx għan-nofs li sab lil Yuri de Jesus Messias li minn taħt il-lasta, ra t-tentattiv tiegħu jistampa mal-mimduda qabel intemm barra.
L-iskor baqa’ ma nbidilx sa tmiem il-partita.
Referee: Alex Johnson
BOV Plejer tal-Logħba: Ryan Scicluna (Marsaxlokk)
