Gzira U. u Balzan temmew il-konfront ta’ bejniethom fi draw ta’ mingħajr goals fejn ironikament dan kien it-tieni riżultat ta’ draw konsekuttiv bl-istess skor bejn iż-żewġ timijiet wara dak miksub nhar il-Ġimgħa li għadda fil-Gozo Stadium.
Balzan kellhom lill-player Samir Arab sospiż.
Kienu Gzira li ħolqu l-ewwel periklu fid-disa’ minuta, meta l-player tal-logħba Thaylor Aldama indirizza cross fil-kaxxa, li sab lil Thiago Espindola żmarkat, li minn taħt il-lasta sab lill-goalkeeper ta’ Balzan Danilo Golovic attent li salva tajjeb.
Balzan wieġbu sis-36 minuta, permezz ta’ xutt minn barra l-kaxxa ta’ Jan Busuttil li ntemm għoli.
Gzira reġgħu ħolqu l-periklu fil-50 minuta, meta Nicholas Pulis kellu pass erratiku f’nofs il-ground b’Thaylor Aldama jinterċetta tajjeb u b’pass mal-ewwel sab lil Faysal Chouaib fil-kaxxa, li minn quddiem Golovic spara xutt fil-baxx bil-ballun jintemm ftit barra.
Huma komplew jiddettaw il-llogħob u fis-57 minuta, xutt insidjuż mid-distanza tal-catian gabriel Bohrer Mentz intemm ftit għoli.
Għaxar minuti wara, xutt ta’ Jan Busuttil ġie salvat tajjeb mill-goalkeeper Taljan tal-Maroons, Giulio Mangano.
Fit-72 minuta, freekick mid-distanza ta’ Victor Blasco għal Balzan għadda ftit barra.
Fil-ħin miżjud, wasal l-aħħar ċans għal Gżira b’Thaylor Aldama minn quddiem Golovic inkredibbilment ifalli l-mira, b’Balzan jeħilsuha ħafif.
L-iskor baqa’ ma nbidilx sa tmeim il-partita, biż-żewġ timijiet jieħdu punt kull wieħed.
Referee: Alex Johnson
Plejer tal-Logħba: Thaylor Aldama (Gzira U.)
