Fil-konfront tant mistenni ta’ nofs il-ġimgħa, Hibernians u Sliema W. temmew il-konfront ta’ bejneiehom fi draw ta’ mingħajr goals, biex b’hekk kemm il-Wanderers kif ukoll il-Pawlisti tilfu l-ewwel żewġ punti tal-istaġun.
Iż-żewġ timijiet kellhom il-waqtiet pożiittivi tagħhom fil-partita, u b’hekk dan jista’ jitqies bħala draw ġust.
Kienu Sliema li ħolqu l-ewwel periklu wara biss żewġ minuti meta Samuel Gomes Da Mata kellu l-konklużjoni fil-baxx tiegħu tiġi salvata minn mal-art bi bravura mill-goalkeeper ta’ Hibernians, Hugo Sacco.
Hibernians wieġbu erba’ minuti wara meta Alex Bruno Da Silva minn taħt il-lasta tefa’ inkredibbilment barra, bil-Wanderers jeħilsuha ħafif.
Il-partita kompliet ikkaratterizzata minn ħafna logħob f’nofs il-ground. Dan sat-33 minuta meta konklużjoni mid-distanza ta’ Alex Bruno Da Silva dejjem għall-Pawlisti intemmet ftit barra.
Il-Pawlisti komplew fuq l-offensiva u fit-42 minuta kienu ferm sfortunati li ma fetħux l-iskor meta Alex Bruno Da Silva kellu t-tentattiv tiegħu fil-baxx minn pożizzjoni angulata salvat parzjalment mill-goalkeeper ta’ Sliema, Kelvin Emeka Agu, qabel ħabat mal-mimduda, biex mir-rebound minn taħt il-lasta, il-Grieg Giannis Bastianos għamel l-impossibli u xeħet għoli.
Kien biss fl-64 minuta li waslet l-azzjoni sussegwenti, bil-Pawlisti jkunu huma li joħolqu l-periklu meta Dexter Xuereb kellu xutt kważi minn tarf il-kaxxa li ntemm għoli.
Sliema wieġbu fil-71 minuta meta Gustavo Alcino xeħet cross fid-direzzjonni ta’ Jonata li kellu d-daqqa ta’ ras tiegħu mill-viċin salvata minn mal-art u mingħajr wisq diffilkultá minn Sacco.
Hibernians reġgħu ħolqu l-periklu żewġ minuti biss wara meta Federico Falcone b’dahru lejn il-lasti avversarji kellu r-rovexxjata tiegħu salvata minn Kelvin Emeka Agu.
Huma bdew iżidu fir-ritmu u minuta biss wara konklużjoni mid-distanza ta’ Rodrigo Fraga Khevin intemmet għoli.
Kulma jmur kompla d-dominju ta’ Hibernians u fis-86 minuta tilfu cans tad-deheb li jiskorjaw il-goal tar-rebħa meta Ishaiah Chukunyere għadda tajjeb lejn l-iskorer prolifiku Jurgen Degabriele li dar tajjeb ma’ Henrique Murillo qabel venven xutt b’saħħtu indirizzat għas-saqaf tax-xibka li ħareg l-aħjar ta’ Kelvin Emeka Agu li salva b’mod spettakolari.
Fil-ħin mizjud, Sliema, ipprotestaw għall-penalty meta Kurt Shaw deher li allegatament iffawlja lil Geoffrey Edwin Achaempong iżda r-referee Matthew De Gabriele ħalla l-logħob għaddej.
L-iskor baqa’ ma nbidilx sa tmiem il-partita, biż-żewġ timijiet jieħdu punt kull wieħed.
Referee: Matthew Degabrielle
Plejer tal-Logħba: Steve Pisani (Sliema W.)
