F’konfront li ħa l-ħajja fit-tieni taqsima, Birkirkara u Sliema Wanderers temmew il-konfront ta’ bejniethom fi draw ġust ta’ 1-1, bl-Istripes jilagħbu l-aħħar 20 minuta tal-partita bi player inqas.
Għal Birkirkara ddebutta l-attakkant mill-Ghana Seth Paintsil hekk kif ġie utilizzat fit-tieni taqsima meta ħa post is-sostitut Gislain Yikpe, b’Painstil iżda jerġa’ jiġi sostitwit fit-78 minuta biex spiċċa lagħab 23 minuta biss.
Kien biss fis-36 minuta li waslet l-ewwel azzjoni denja ta’ nota bi Sliema Wanderers jiftħu l-iskor meta l-iskorer prolifiku Sloven VITO PLUT approfitta minn indeċiżjoni fid-difiża ta’ Birkirkara u permezz ta’ xutt fil-baxx minn qagħda ideali tefa’ l-ballun fir-rokna tax-xibka.
Birkirkara wieġbu għall-ewwel darba fil-45 minuta meta wara li rċieva minn freekick qasir, Alessandro Coppola kellu x-xutt fil-baxx tiegħu mid-distanza jintemm ferm barra.
FiL-ftuħ tat-tieni taqsima, Birkirkara, ħarġu aggressivi fit-tentattiv ovvju li jġibu l-iskor indaqs u wara biss ftit sekondi, wara li rċieva minn cross pinġut, Paul Mbong, kelllu d-daqqa ta’ ras tiegħu li ntemmet barra.
Sliema rrispondew fit-52 minuta permezz ta’ xutt b’saħħtu mid-disanza tal-ex tal-partita Simon Zibo li iżda ntemm għoli.
Iżda kienu Birkirkara li ġabu l-iskor indaqs fis-56 minuta meta l-iskorer prolifiku Brażiljan MAXUELL MAIA kien fil-post it-tajjeb fil-mument opportun u b’xamma kbira għall-goal mill-viċin tefa’ gewwa, b’dan ikun l-10 goal staġjonali tiegħu, u b’hekk kompla jikkonsolida postu fil-quċċata tal-klassifika tal-aqwa skorers.
Il-Wanderers reġgħu ħolqu l-periklu tliet minuti wara meta freekick insidjuż tal-ispeċjalista Steve Pisani ġie mdawwar f’corner bi bravura mill-goalkeeper tal-Istripes, Giacomo Volpe.
Il-partita kompliet tisbieħ u fit-63 minuta, freekick tas-sostitut Maicon għal Birkirkara għadda ftit barra.
Seba’ minuti wara, Birkirkara qalgħu daqqa ta’ ħarta hekk kif spiċċaw jilagħbu b’10 players meta tkeċċa għalihom il-player Maxuell Maia wara li rċieva żewġ karti sofor fil-partita.
Fil-91 minuta, Sliema tilfu ċans tad-deheb li jiskorjaw il-goal tar-rebħa meta Jonata Bastos kellu komklużjonu dijagonali minn pożizzjoni ideali li għaddiet tħakkekt ma’ sieq il-wieqfa.
L-iskor baqa’ ma nbidilx sa tmiem il-partita, biż-żewġ timijiet jieħdu punt kull wieħed.
Referee: Malcolm Spiteri
Plejer tal-Logħba: Geoffrey Edwin Achempong (Sliema W.)
Ritratt: Birkirkara FC Media
