Fic-Centenary Stadium is-Sibt wara nofsinhar Marsaxlokk u Gudja ħadu punt kull wieħed fid-draw ta’ 1 – 1.
Kienu Gudja li fetħu l-aħjar u ħolqu l-ewwel azzjonijiet denji ta’ nota bl-ewwel azzjoni tasal fit-18-il minuta meta minn kross ta’ Karl Micallef, Vito Plut ma ħax tajjeb bir-ras minn qagħda ċentrali.
Fis-26 minuta minn korner mogħti minn Navarrete kien Neil Micallef li ttanta xortiħ b’xutt bit-takkuna li għadda jħakkek mal-lasta l-wieqfa.
Gudja marru fil-vantaġġ fil-31 minuta meta Karl Micallef qassam lil Tatsuro Nagamatsu li b’xutt għar-rokna għeleb lill-gowler Xlukkajr Drobnjak.
Kien imiss lil Marsaxlokk li joħorġu mill-qoxra difensiva tagħhom u fit-38 minuta minn korner ta’ Moracci, id-daqqa ta’ ras ta’ Xuereb ġiet interċettata f’korner ieħor.
Ix-Xlukkajri komplew jagħfsu biex fit-42 minuta xutt mill-bogħod ta’ Ferraris ġie salvat f’korner mill-gowler Pisani.
Iżda mill-azzjoni tal-korner, Moracci xeħet ghan-nofs u Claudio Bonanni skorja mil-qrib.
Fil-ħin miżjud qabel intemmet l-ewwel taqsima, Marsaxlokk kellhom freekick dirett mogħti minn Aguirre li l-gowler Pisani salva f’korner.
Half-Time 1-1
Fit-tieni taqsima, iż-żewġ naħat naqqsu ħafna mir-ritmu tal-logħob tant li kellna nistennew sad-69 minuta sabiex nassistu għal azzjoni denja meta xutt imkaxkar tas-sostitut Fonseca ta’ Marsaxlokk għadda jħakkek ma’ sieq il-lasta.
Ħames minuti wara kienu Gudja li resqu qrib permezz ta’ tentattiv ta’ Navarrete li wkoll għadda kemm kemm barra.
Referee: Trustin Farrugia Cann
Player tal-Loghba: Karl Micallef (Gudja Utd)
