Fl-ewwel partita tas-sibt wara nofsinhar fit-Tony Bezzina Stadium, Floriana u Gudja ħadu punt kull wieħed fid-draw ta’ 1 – 1.
Floriana kellhom l-aktar mil-logħob għal ħafna ħin matul l-ewwel taqsima u fethu l-iskor fl-ewwel azzjoni li ħolqu fis-7 minuta meta Lorenzo Trillo kkrossja għan-nofs u Mattia Veselji minn qagħda tajba spara l-ballun fix-xibka.
Minkejja li ppruvaw iwettqu reazzjoni, Gudja qatt ma kienu effettivi tant li kienu Floriana li reggħu resqu qrib fl-20 minuta iżda x-xutt ta’ Trillo ġie salvat tajjeb mill-gowler Gudjan Glenn Zammit.
Fit-28 minuta Trillo rega’ pprovda kross tajjeb iżda Kemar Reid minn qagħda ideali xxuttja barra. Sitt minuti wara kien Jose Arias li xxuttja minn tarf il-kaxxa imma Zammit salva tajjeb.
Erba minuti minn tmiem l-ewwel taqsima ċans ieħor tajjeb għal Floriana li jiskurjaw meta Zammit ħareg ħazin imma Trillo naqas li japprofitta u xxuttja għoli.
Fit-tieni taqsima Gudja wrew titjib fil-logħob tagħhom u kienu huma li fetħu fuq l-attakk tant li fis-47 minuta l-gowler Duncan Formosa salva b’diffikulta’ xutt ta’ Vito Plut, waqt li tliet minuti wara l-istess Formosa reġa’ salva tajjeb xutt ta’ Tatsuro Nagamatsu.
Fl-54 minuta Floriana kienu għoddhom irduppjaw meta minn korner mogħti minn Jan Busuttil, id-daqqa ta’ ras ta’ Mattia Veselji dehret destinata għal ġewwa imma Karl Micallef ikklerja fuq il-linja.
Ma’ kważi siegħa logħob Floriana spiccaw jilgħabu b’10 plejers meta r-referee wera karta hamra lill-gowler Duncan Formosa li deher joħroġ sa tarf il-kaxxa l-kbira biex waqqaf b’idu attakk tal-Gudja. Kien hemm dubju jekk fil-fatt Formosa qabiżx il-kaxxa l-kbira imma l-assistant referee Edward Spiteri ndika lir-referee Daniel Casha li Formosa kien żamm il-ballun b’idu barra l-kaxxa u għalhekk urieħ il-karta l-ħamra.
Fit-62 minuta kienu Floriana li resqu qrib meta Trillo temm azzjoni personali b’xutt li Zammit salva f’korner.
Tlett minuti wara Gudja skurjaw il-goal tad-draw meta korner mogħti minn Nicolas Navarrete ħoloq taħwida fil-kaxxa ż-żgħira u Farid Zuniga Romero skorja mill-qrib.
Referee: Daniel Casha
Plejer tal-Logħba: Lorenzo Trillo (Floriana)
