Il-loghba bejn Birkirkara u Balzan intemmet fi draw li ċertament ma’ kkuntenta lil ħadd, specjalment lil Balzan li riedu t-tliet punti biex jitbegħdu miż-żona l-ħamra. Kollox ma’ kollox pero’ jista’ jingħad li kien riżultat ġust.
Balzan fetħu fuq l-attakk u resqu qrib fid-9 minuta meta xutt ta’ Aleksa Andrejic ġie salvat tajjeb mill-goalkeeper Karkariż Marcel Zapytowski, waqt li tliet minuti wara l-istess Zapytowski nterċetta tajjeb id-daqqa ta’ ras ta’ Nikola Braunovic minn azzjoni ta’ corner.
Birkirkara wieġbu fis-17-il minuta minn azzjoni ta’ freekick mogħti minn Andrea Zammit iżda d-daqqa ta’ ras ta’ Simon Zibo għaddiet ftit għoli.
Fid-29 minuta kien il-Ġappuniż Rohei Michibuchi li ttestja lill-goalkeeper Karkariż b’xutt minn tarf il-kaxxa, waqt li n-naħa l-oħra ħames minuti wara Andrea Zammit kellu xutt salvat mill-goalkeeper ta’ Balzan Rudy Briffa.
Fit-38 minuta Jan Busuttil bidel il-ballun ma’ Michibuchi iżda x-xutt tiegħu ġie salvat minn Zapytowski.
Biss ħames minuti wara l-istess goalkeeper Karkariż kellu jiġbor il-ballun mix-xibka hekk kif din id-darba l-istess Jan Busuttil fajjar xutt li ma jaħfirx.
Birkirkara ħolqu l-ewwel periklu fit-tieni taqsima, eżattament fil-51 minuta, meta minn freekick mogħti minn Andrea Zammit, Enrico Pepe xeħet għan-nofs fejn ix-xutt ta’ Simon Zibo ġie mblukkat f’corner.
Minuta wara, in-naħa l-oħra, George Blackwood daħal fil-kaxxa imma x-xutt tiegħu ġie salvat mill-goalkeeper Zapytowski.
Fis-57 minuta Birkirkara skurjaw il-goal tad-draw meta Andrei Ciolacu direttament minn freekick għeleb lill-goalkeeper Briffa.
Iż-żewġ naħat tħabtu biex jiskurjaw il-goal tar-rebha bl-aktar li jersqu qrib ikunu Birkirkara fid-79 minuta meta l-goalkeeper Briffa nterċetta b’diffikulta’ freekick mogħti minn Paul Mbong.
Fit-88 minuta mbagħad minn corner ta’ l-istess Mbong, Briffa salva fuq Enrico Pepe.
Referee: Alex Johnson
BOV Plejer tal-Logħba: Jan Busuttil (Balzan)
