Kif ħabbarna, permezz ta’ dan is-sit lura f’Awwissu, il-personalita’ Dorian Cassar se jingħaqad mal-familja tal-istazzjonijiet ONE, mill-iskeda l-ġdida li tibda nhar it-Tnejn li ġej, 2 t’Ottubru.
F’dawn l-aħħar ġimgħat, Dorian kien involut f’diversi laqgħat u preparament sabiex jħejji ruħu sew għal din l-iskeda. Infatti, Dorian se jkun qed imexxi l-ewwel programm tal-ġurnata fuq it-televiżjoni permezz ta’ ONE BREAKFAST. Għalkemm ilu bosta snin involut fil-qasam tax-xandir, għal Dorian din se tkun esperjenza ġdida li jmexxi programm kuljum. ONE BREAKFAST ser jibda jixxandar mit-Tnejn sal-Ġimgħa mis-6:30am sa’ qabel il-quddiesa tat-8am.
Ma’ Dorian se jingħaqdu Elaine Degiorgio u Claudia Cuschieri bl-analiżi tal-ġurnali u d-diskursati politiċi, filwaqt li Mariah Meli u Simeon Nechev se juruna x’qed jiġri barra mill-istudios.
Apparti li se narawh kuljum permezz ta’ ONE BREAKFAST fuq it-televiżjoni, lil Dorian nistgħu nisimgħu kull nhar ta’ Tnejn, Erbgħa u Ġimgħa permezz tad-DRIVE-TIME ta’ ONE Radio 92.7fm mill-4pm ‘l quddiem
