F’dak li huwa meqjus bħala d-derby l-antik ta’ Malta, Floriana għelbu lil Sliema Wanderers bl-iskor ta’ 2-0, biż-żewġ goals għalihom jaslu proprju fit-tieni taqsima.
Dan kien riżultat ripetizzjoni tal-ewwel round hekk kif f’dak ir-round kienu Floriana li għelbu lill-Wanderers bl-iskor identiku ta’ 2-0, biż-żewġ goals għalihom dakinhar ukoll jaslu fit-tieni taqsima.
Indubbjament, din kienet rebħa meritata għall-Greens bl-iskor għalihom seta’ jkun wieħed ikbar, li kieku approfittaw minn numru ta’ azzjonijiet perikolużi li ħolqu tul il-partita.
Fid-disa’ minuta, il-coach Taljan ta’ Floriana Mauro German Camoranesi kien kostrett jaffettwa sostituzzjoni sfurzata meta weġġa’ għalihom il-player Guy Serge Cedric Yameogo biex minfloku daħal jilgħab is-sostitut Alexandros Kouro.
Kienu Sliema Wanderers li ħolqu l-ewwel periklu fit-13-il minuta meta Joseph Minala kellu x-xutt b’saħħtu tiegħu kważi minn tarf il-kaxxa jintemm għoli.
Floriana wieġbu fid-29 minuta meta Kemar Reid qabeż tajjeb plejer avversarju qabel vevnen xutt sabiħ fil-baxx li ħareġ l-aħjar tal-goalkeeper tal-Wanderers Rsahed Al Tumi li dawwar f’corner bi bravura.
Floriana mill-ġdid perikolużi fl-44 minuta meta Matias Nicolas Garcia kellu xutt fil-baxx mid-distanza jintemm barra.
Fil-ftuħ tat-tieni taqsima, Floriana ħarġu ferm aggressivi u ta’ dan ġew ippremjati meta fit-53 minuta fetħu l-iskor permezz ta’ freekick mill-isbaħ fil-baxx ta’ Willis Furtado, li ma ta l-ebda ċans lil Al Tumi sabiex jsalva. Huma komplew fuq l-offensiva u mas-siegħa logħob Kemar Reid kellu xutt minn tarf il-kaxxa jiġi salvat mingħajr wisq diffikultá minn Al Tumi.
Kulma jmur, Floriana komplew jiddettaw il-logħob u fit-78 minuta reħbu penalty meta Al Tumi deher jikkommetti foul fuq Oualid El Hasni fil-kaxxa bir-referee jordna penalty. Mill-11-il metru inkariga ruħu Willia Furtado li spara l-ballun fis-saqaf tax-xibka, biex b’hekk irreġistra doppjetta personali.
Fil-90 minuta Floriana spiċċaw jilgħabu b’plejer anqas meta Maksim Valadzko intwera t-tieni karta safra.
Il-Greens komplew jamministraw il-vantaġġ doppju li kellhom sa tmiem il-partita.
Referee: Trustin Farrugia Cann
BOV Plejer tal-Logħba: Willis Furtado (Floriana FC)
