Se ssir maratona ġbir ta’ fondi b’risq St. Michael Hospice, l-aktar proġett riċenti ta’ Hospice Malta, li qed timmira li tuża dawn il-fondi biex tkabbar il-kumpless tagħha.
F’konferenza tal-aħbarijiet li għaliha kien hemm preżenti wkoll mart il-President ta’ Malta u Patruna ta’ Hospice Malta, is-Sinjura Miriam Vella, intqal fost l-oħrajn kif b’dan il-proġett, Hospice Malta se tintroduċi fost l-oħrajn kumpless, li se jippermetti biex pazjenti b’mard terminali jibqgħu jieħdu l-kura u t-terapija f’dan il-post ma’ qrabathom.
Bit-tema ‘Bl-Imħabba Naslu’, il-maratona se ssir nhar il-Ħadd, 14 ta’ Frar u se tixxandar fuq l-istazzjonijiet lokali. Il-ħsieb li ssir f’Jum San Valentinu hija biex aħna lkoll nifhmu u nuru l-imħabba fil-forom kollha tagħha.
Kenneth Delia, General Manager ta’ Hospice Malta, spjega li kien ilu jinħass il-bżonn għal proġett bħal dan biex l-għaqda jkollha riżorsi u spazju aħjar biex tkompli taħdem.
“Biżżejjed ngħidu li tul is-sena jkollna madwar 1,300 familja, u mas-70 pazjent ġdid kull xahar. Kull pazjent jiġi bi storja jew b’xi diffikultajiet differenti minn oħrajn. Aktar ma nappoġjaw lil xulxin, aktar dan il-proċess se jkun ta’ suċċess u jkun jista’ jgawdi minnu l-pubbliku kollu.”
Tul il-pandemija, Hospice Malta żiedet ukoll servizzi psikoloġiċi għal dawk li tilfu qraba bil-COVID-19, u mexxiet ħafna mis-servizzi tagħha b’mod virtwali.
“Aħna nħobbu ngħidu li nikkonċentraw aktar fuq il-ħajja. Sfortunatament, din hi realtà li hi żgura, imma b’dan il-mod aħna nagħmluha żmien fejn il-familja tingħaqad aktar u ċertu affarijiet li qabel ma setgħux isiru, jkunu jistgħu jsiru f’dak iż-żminijiet. Għalina hu ta’ sodisfazzjon.”
Is-Sinjura Miriam Vella qalet li Hospice Malta ilha taħdem għal aktar minn 30 sena, u rringrazzjat lill-voluntiera kollha li jagħtu ħinhom għal dan.
Hija temmet b’appell biex ilkoll nagħtu ftit milli nistgħu, biex intaffu ftit mill-uġigħ li qed jgħaddu minnu dawn il-persuni.
“Kull qatra tgħodd, hux hekk ngħidu bil-Malti? Nagħmel appell minn qalbi biex bħalma dejjem kienu n-nies, ġenerużi, ikunu anke nhar il-Ħadd biex ngħinu lil Hospice Malta jaslu għax-xewqa li għandhom.”
