Frisk mill-ġurament tal-ħatra u hekk kif daħal dritt fl-uffiċju ovali tal-White House, il-President Repubblikan Donald Trump malajr beda juża s-setgħa tiegħu u ffirma sensiela ta’ azzjonijiet eżekuttivi, memorandums presidenzjali u ordnijiet eżekuttivi li jittrattaw għadd ta’ prijoritajiet tal-politika tiegħu.
Ordnijiet Eżekuttivi jġorru l-piż tal-liġi iżda dejjem jistgħu jiġu mibdula minn presidenti sussegwenti jew il-qrati u għalhekk huwa mistenni li ħafna minn dawk iffirmati minn Trump se jkunu qed jiffaċjaw sfidi legali. Sintendi l-ewwel ma beda jwettaq kienet il-wegħda prinċipali tal-kampanja tiegħu li titratta l-immigrazzjoni illegali u l-għeluq tal-fruntieri.
Trump iffirma direttiva li ddikjarat emerġenza nazzjonali fuq il-fruntiera tan-Nofsinhar u anke attakka ċ-ċittadinanza awtomatika għal tfal ta’ imigranti illegali iżda li jkunu twieldu fl-Istati Uniti. Huwa wkoll iffirma ordni li għandha tissospendi l-programm ta’ risistemazzjoni tar-refuġjati fl-Istati Uniti għal erba’ xhur, għalkemm d-dettalji ma kinux ċari.
Trump ordna wkoll lill-militar sabiex jagħlqu l-fruntieri fejn irrefera li dawn qed ikunu lok ta’ dħul ta’ drogi illegali, traffikar uman u attivitajiet kriminali.
Huwa wkoll iffirma direttiva li tindika l-cartel tad-droga u gangs internazzjonali bħala organizzazzjonijiet terroristiċi. F’din lista fost l-oħrajn hemm l-Al-Qaeda, l-hekk imsejjaħ Stat Iżlamiku, l-Hamas, il-gang migranti Salvadorjan MS-13 u dak Veneżweljan Tren de Aragua.
Bħala parti minn din l-ordni qal li l-fruntieri għandhom jingħalqu b’kostruzzjoni fejn wieħed ifakkar il-ħajt li kien ta ordni biex jinbena fl-2016 u reġa implimenta il-politika “Remain in Mexico”, miżura li fl-ewwel mandat tiegħu kienet irritornat lura 70,000 Messikan li kienu qed ifittxu l-ażil.
Fl-istess ordni huwa waqqaf sistema ta’ żmien Biden li kienet inizjattiva sponsorjata u li kienet tippermetti għal madwar 30,000 immigrant minn Cuba, Haiti, Nicaragua u l-Venezuala sabiex jidħlu bl-ajru fl-Istati Uniti. Din il-politika magħrufa bħala CHNV kienet intenzjonata sabiex tnaqqas id-dħul illegali fuq il-fruntieri.
Barra minn hekk iffirma ordni eżekuttiva li reġgħet daħlet il-piena tal-mewt. Din l-ordni telenka dettalji ta’ fuq min għandha tintuża din il-piena u tinkludi kwalunkwe delitt kapitali mwettaq minn barrani preżenti illegalment fl-Istati Uniti u kull min jinsab ħati ta’ qtil ta’ uffiċjal tal-infurzar tal-liġi.
Fis-sensiela ta’ ordnijiet eżekuttivi kien hemm ukoll dik li temmet il-prattika li immigranti illegali setgħu jibqgħu jgħixi fil-komunità sakemm jinstema’ l-każ tagħhom.
Dan kollu bħala parti mill-wegħda tiegħu li kellu jniedi l-akbar programm ta’ deportazzjoni fl-istorja Amerikana u anke jtemm il-politika li kienet tipprojbixxi lill-awtoritajiet federali tal-immigrazzjoni milli jwettqu tfittiex fi knejjes u skejjel.
Minkejja dan, tali wegħdiet jistgħu jiffaċċjaw reżistenza legali u loġistika.
