Bħalissa għaddejjin taħditiet mal-Gvern dwar il-kondotti hekk imsejħa maħmuġa ta’ individwi li jkunu, fost l-oħrajn, skontaw sentenza l-ħabs, sabiex fuqhom jibda jitniżżel ukoll il-progress li tkun għamlet din il-persuna.
Dan tħabbar minn Matthew Degiorgio mill-Fondazzjoni Rise, f’diskussjoni waqt il-konferenza bit-tema ‘Ix-xogħol… u l-Addiction?’ li organizzat il-Fondazzjoni OASI bil-kollaborazzjoni mar-Reġjun Tramuntana
Din kienet waħda mit-temi li ġew diskussi waqt din il-konferenza, li tefgħet dawl fuq x’impatt ikollu x-xogħol fuq persuna li tkun għaddejja minn sfidi ta’ vizzji.
L-għan ta’ din il-konferenza kien li jiġu diskussi numru ta’ suġġetti soċjali. Fl-indirizz tiegħu, il-Ministru għall-Politika Soċjali, Michael Falzon, qal li l-Gvern qed jinvesti f’organizzazzjonijiet li jaħdmu ma’ persuni li jkunu dipendenti fuq xi sustanza.
Il-President tar-Reġjun Tramuntana, Clifford Galea Vella Maslennikov, qal li l-Kunsilli Lokali jmorru lil hinn minn infrastruttura u t-tindif fil-lokal, iżda anke jkunu attivi fl-iżvilupp soċjali. Huwa għalhekk li saret din il-konferenza. li fiha ħadu sehem mad-disa’ kunsilli lokali fit-tramuntana tal-pajjiż.
Qal, “Għalhekk ħassejna l-ħtieġa li, bħala Reġjun Tramuntana, li ngħinu lill-Fondazzjoni Oasi li wkoll ħarġu bl-idea li nagħmlu din il-konferenza, fejn l-attendenza kienet waħda vera numeruża u anke l-Kunsilli Lokali li attendew, biex anke nqajmu kuxjenza u għarfien ħalli dak li jkun ikun jaf li jekk, ġaladarba jgħaddi minn esperjenza li mhi xejn pjaċevoli, ikun jaf kif jieħu ħsiebha, jikkuraha, u anke joħroġ minnha.”
Fl-indirizz tal-għeluq tiegħu, il-President ta’ Malta George Vella osserva li l-ħidma tal-Fondazzjoni OASI tmur lil hinn mill-irwol oriġinali tagħha ta’ ċentru għar-riabilitazzjoni. Stqarr li jemmen bis-sħiħ li l-ebda persuna m’għandha tiċċaħħad milli jkollha aċċess għal taħriġ professjonali u opportunitajiet ta’ xogħol dinjitużi.
