L-eżekuttiv u l-amministrazzjoni tal-Partit Laburista se jkunu qed jiddiskutu emendi fl-istatut dwar il-kariga ta’ Deputat Mexxej għall-Affarijiet tal-Partit li mistennija timtela’ x-xahar id-dieħel.
Id-diskussjoni se tkun dwar jekk il-kariga tad-Deputat Mexxej għall-Affarijiet tal-Partit jokkupahiex membru parlamentari jew le. B’hekk min ma jkunx deputat fil-Kamra tar-Rappreżentanti jkun iffukat iżjed fuq il-ħidma tal-partit. Waqt intervista mal-Prim Ministru Robert Abela waqt il-maratona ġbir ta’ fondi bit-tema ‘Inkomplu Niġġeddu’, intqal li għada f’Marsaxlokk se jkunu qed jitlaqqa’ l-eżekuttiv u l-amministrazzjoni tal-partit.
Il-Prim Ministru spjega kif speċjalment meta partit ikun fil-Gvern, id-Deputat Mexxej għall-Affarijiet tal-Partit għandu żewġ funzjonijiet kruċjali x’jaqdi, dik li jara li l-partit fil-Gvern jimplimenta l-wegħdiet fil-manifest elettorali u anki dik ta’ skrutinju fuq il-Gvern. “Anki meta għandek il-partit fil-Gvern, il-partit irid iressaq l-ideat fejn il-Gvern ikun jista’ jilqagħhom u jikkunsidrahom”, saħaq Dr. Abela.
Il-Prim Ministru tkellem dwar l-għaqda li teżisti fil-Partit Laburista fejn għandek kulħadd jaħdem għal għan wieħed. Qal li l-idea li l-eżekuttiv u l-amministrazzjoni tal-partit jibdew jiltaqgħu fl-ibliet u l-irħula Maltin u Għawdxin hija xi ħaġa li se tibqa’ tinżamm u anki l-Konferenza Ġenerali mistennija tibda toħroġ anki miċ-ċentru nazzjonali Laburista tal-Ħamrun.
Il-Prim Ministru tkellem ukoll fuq temi oħra fosthom fuq kif pajjiżna rnexxielu jikkontrolla b’mod eċċellenti l-imxija. “Ejja niftakru x’ġara f’pajjiżi ġirien tagħna u anki oħrajn Ewropej. Dawn krollaw iżda pajjiżna bbrilla fuq livell ta’ saħħa u anki dak ekonomiku”, irrimarka l-Prim Ministru li saħaq li issa qed iħares lejn dan iż-żmien fejn reġgħet bdiet iddur ir-rota ekonomika.
Se jkollna l-1 ta’ Lulju meta se jiftaħ l-ajruport u s-settur turistiku jerġa’ jibda jopera. Huwa partikolarment sellem u rringrazzja lil dawk li kienu fuq quddiem tal-ġlieda kontra l-pandemija. “Dawn ħallew kollox u taw servizz”, aċċenna l-Prim Ministru.
Il-Prim Ministru semma wkoll kif issa bħala mexxej ta’ stat membru tal-Unjoni Ewropea jrid jara li jintlaħaq qbil fil-budget Ewropew 2021-2027. Qal li ma’ dan il-budget, minħabba ċ-ċirkostanzi straordinarji li d-dinja għexet riżultat tal-imxija, se jiġi inkluż ukoll il-pjan ta’ rkupru mill-pandemija. Il-Prim Ministru qal li issa l-affarijiet iridu jimxu b’iżjed pass mgħaġġel ħalli jintlaħaq qbil dwar dan il-budget.
Fl-istess intervista tkellmu wkoll mart il-Prim Ministru, is-Sinjura Lydia Abela u bint il-familja Abela, Giorgia Mae. Lydia Abela tkellmet dwar l-irwol li qed tgħix issa, ta’ spalla ma’ żewġha, il-Prim Ministru u anki rringrazzjat lill-għalliema kollha li baqgħu jagħtu s-servizz edukattiv lit-tfal, minkejja l-imxija.
Fl-intervista ma’ Dr. Lydia Abela spikka wkoll ħidmietha favur il-ħarsien tal-annimali, b’Giorgia Mae tkellmet dwar l-imħabba li għandha għall-annimali. F’Giorgia Mae spikka s-sens ta’ responsabilità hekk kif hija flimkien ma’ ommha, Lydia Abela, tieħu ħsieb l-annimali billi titmahom u tisqihom. Lydia Abela qalet ukoll kif, Robert Abela jieħu ħsieb li minkejja l-impenji kbar li għandu jqatta’ ħin ta’ kwalità mal-familja u anki fi tmiem il-ġimgħa huwa jiddiskuti x-xogħol tal-iskola ta’ bintu u jagħtiha l-attenzjoni kollha meħtieġa.
Fuq nota leġġera, Giorgia Mae tkellmet dwar l-ismijiet li tagħti lill-annimali li għandha d-dar u semmiet kif ġabet kelb minn Għawdex, bil-Prim Ministru jgħid li nduna b’dan il-membru ġdid fil-familja Abela, mill-facebook.
