L-Erbgħa filgħodu, fis-sala tal-plenarja tal-Parlament Ewropew fi Strasburgu, il-Prim Ministru Malti Joseph Muscat ippreżenta lill-Parlament Ewropew il-prijoritajiet tal-Presidenza Maltija.
Wara li għal diversi snin serva bħala Membru tal-Parlament Ewropew, Muscat indirizza lil dawk preżenti bħala President tal-Kunsill tal-Unjoni Ewropea permezz ta’ diskors b’viżjoni.
Diskors li f’iktar minn okkażjoni waħda, il-Membri tal-Parlament Ewropew ċapċpu b’approvazzjoni għal dak li kien qed jingħad mill-Prim Ministru Muscat.
Din l-approvazzjoni ngħatat ukoll bil-kliem, hekk kif fi tmiem tad-diskors ta’ Muscat, il-Membri Parlamentari Ewropej kellhom l-opportunità jagħtu r-reazzjoni tagħhom.
Ma naqsux ukoll il-kummenti fuq is-sit soċjali Twitter, fejn il-hashtag #EU2017MT tinsab fuq nett fuq il-lista tal-iktar hashtags użati.
Fil-Parlament Ewropew, Manfred Weber, il-mexxej tal-Partit Popolari Ewropew, qal li “pajjiż żgħir bħal Malta, li grazzi għas-sħubija tiegħu fl-Unjoni Ewropea sar pajjiż iktar b’saħħtu, jista’ jifrex l-influwenza tiegħu, u huwa għalhekk li nilqgħu il-Presidenza Maltija bħala simbolu b’saħħtu.”
Fuq Twitter, diversi faħħru d-diskors b’saħħtu tal-Prim Ministru Joseph Muscat, b’Josef Weidenholzer, Viċi President tal-Partit tas-Soċjalisti u Demokratiċi, jgħid li kien impressjonat bl-intervent tiegħu, filwaqt li James Kanter, korrispondent ta’ New York Times, qal li l-Kummissjoni Ewropea għandha x’titgħallem minnu.
Weidenholzer, li kien intervistat ukoll waqt il-programm Pjazza, qal li l-Prim Ministru Muscat “ta messaġġ ċar u preċiż li l-pajjiżi ż-żgħar kapaċi jagħmlu sforz kbir, u nemmen li għamel diskors tajjeb ħafna, kien preparat, anke fid-dawl li huwa eks Membru ta’ din il-Kamra. Kulħadd kien impressjonat.”
Il-mexxej tal-Alleanza Liberali u Demokratiċi għall-Grupp Ewropew Guy Verhofstadt sostna li l-Prim Ministru Muscat dejjem għamel xi ħaġa li se tkun meħtieġa: “Grazzi Prim Ministru tal-intervent li jispira. Grazzi talli dejjem iddefendejt il-Parlament Ewropew, u dan se jkun meħtieġ fix-xhur li ġejjin.”
Il-Partit tas-Soċjalisti u Demokratiċi, permezz tal-Viċi President Maria Joao Rodrigues, enfasizza fuq punt kruċjali li tkellem dwaru l-Prim Ministru Malti: “Ewropa soċjali hija verament fiċ-ċentru ta’ kollox, biex b’hekk tgħaqqad liċ-ċittadini u tagħmel l-aħjar possibbli mid-drittijiet soċjali Ewropej.”
Uħud minn dawk li segwew id-diskors tal-Prim Ministru tkellmu wkoll fuq l-aspett soċjali permezz ta’ Twitter. Il-Membru Parlamentari Ewropej Skoċċiża Catherine Stihler qalet li Ewropa soċjali hija l-iktar fattur importanti għall-Unjoni Ewropea.
Il-korrispondent ta’ New York Times Kanter staqsa jekk din hix l-iktar Presidenza Progressiva li qatt kien hemm, filwaqt li Conny Reuter, is-Segretarju Ġenerali ta’ Solidar, sostna li huwa ta’ ġid li l-aspett soċjali reġa’ tpoġġa f’postu, anke għall-benefiċċju tas-suq intern.
Dwar dan l-aspett, Weidenholzer qal li “din hija ċ-ċavetta li tagħti t-tweġiba għan-negattività li hawn bħalissa, li ġġib lura l-mistoqsijiet soċjali u tindirizza l-biżgħat tan-nies u t-tweġibiet ‘short-term’ li jistgħu jeqridu l-Ewropa.”
Oħrajn tkellmu dwar it-tema tal-immigrazzjoni, fejn sostnew li din kienet ħaġa f’lokha li qed tingħata l-prijorità minn pajjiż li għandu l-leġittimità jitkellem dwarha.
Fuq Twitter, Regina Catrambone, li hija Fundatur u Direttur ta’ MOAS, enfasizzat fuq il-ħtieġa li jitwaqqfu l-kriminali tal-immigrazzjoni filwaqt li l-Membru Parlamentari Ewoprej Slovena Tanja
Fajon irrimarkat li żgur mhux forsi li Malta tifhem perfettament it-traġedji tar-refuġjati.
F’kummenti waqt il-programm Pjazza, il-Membru Parlamentari Ewropew Grieg Miltos Kyrkos qal li “l-proposta tal-Prim Ministru Muscat għall-problema tal-immigrazzjoni kienet fid-direzzjoni t-tajba. Li qal kien li l-Ewropa għandha bżonn sistema tal-ażil komuni, li rridu ninfurzaw ir-rilokazzjoni u jeħtieġ li kull stat membru jrid jerfa’ r-responsabbiltà f’dak li għandu x’jaqsam is-solidarjetà fl-Ewropa.”
Mitlub jagħti r-reazzjoni tiegħu dwar l-istess suġġett, id-Deputat Editur tal-aġenzija AFP Danny Kemp qal li “probabbilment hemm iktar determinazzjoni milli realiżmu attwali f’dak li għandu x’jaqsam li jintlaħaq ftehim. Il-ftehim tat-Turkija kien kumpless u diffiċli ħafna biex jintlaħaq u ħa iktar minn sitt xhur, u niddubita kemm se jintlaħaq ftehim waqt il-Presidenza Maltija. Madanakollu, jaf ikun hemm il-pjan bażiku għal dan il-ftehim.”
Dwar Brexit, il-Membru Parlamentari Ewropew Awstrijak Weidenholzer qal li “hija xi ħaġa tajba li l-istituzzjonijiet Ewropej iridu jkunu involuti u dak ifisser li Muscat jaf sew l-importanza ta’ dan u li l-Ewropa komunitarja trid tkun involuta.”
Ma naqsux ukoll l-interventi tal-Membri Parlamentari Ewropej tal-Partit Laburista.
Miriam Dalli sostniet li tinsab kburija li hija Maltija, filwaqt li sostniet li huwa ta’ vantaġġ li pajjiżna huwa wieħed żgħir għax dan iqarreb iktar il-politiċi lejn iċ-ċittadini u għalhekk jafu xi jridu.
Fuq l-istess bażi, se ssir ħidma biex l-Unjoni Ewropea tkun relevanti għaċ-ċittadini.
Il-Kap tad-Delagazzjoni Laburista fil-Parlament Ewropew Alfred Sant qal li l-Unjoni Ewropea għandha tiffoka fuq il-politika li tagħti importanza lill-pajjiżi tal-madwar biex verament ikollna Ewropa sikura.
Dan filwaqt li l-Membru Parlamentari Ewropew Marlene Mizzi sostniet li Malta, permezz tal-Presidenza tal-Kunsill tal-Unjoni Ewropea, tista’ tagħti nifs ġdid lill-proġett tal-Ewropa.
Dan l-artiklu tista’ ssibu fil-gazzetta KullĦadd
