Minkejja li Kap ġdid, il-PN sejjer minn ġot-taġen għal ġon-nar f’dak li huma drittijiet ċivili
Gvern Laburista imexxi mill-Prim Ministru Joseph Muscat biss huwa garanzija ta’ aktar dritijiet civili, dan għaliex l-Opożizzjoni Nazzjonalista ma’ tistax tagħti din il-garanzija. Tkellmet dwar dan il-Ministru għall-Affarijiet Ewropej u Ugwaljanza Helena Dalli f’ konferenza tal-aħbarijiet.
“L-Oppożiżzjoni Nazzjonalista ma tistax tagħti din il-garanzija” qalet il-Ministru. “U dan nistgħu narawh anke bil-kontestanti li qed jaspiraw li jmexxu lill-Partit Nazzjonalista.”
Chris Said sostna li ġaladarba jkun elett Kap tal-PN, huwa jbiddel il-liġi biex ineħħi l-kunċett ta’ ugwaljanza sħiħa li fiha. Dr Said qiegħed jikkontradixxi lilu innifsu meta fil-Parlament hu ma qamx bil-wieqfa meta mistoqsi u vvota kontra l-liġi li issa jrid ibiddel. Dan juri nuqqas ta’ prinċipji u politika ta’ konvenjena. Meta Said kien il-Ministru tal-Politika Soċjali, kien responsabbli għat-taħwid fil-liġi tal-koabitazzjoni. Li kellu jimplimenta Gvern Laburista.
Infakkru li meta Said kien ministru kien għamilha ċara li koppja tal-istess sess mhijiex familja u li ma kienx il-public policy tal-Gvern Nazzjonalista li jirrikonoxxi dawn il-familji. Il-bidla fil-kliem fil-liġi saret sabiex kull ġenitur, irrispettivament mill-ġeneru jew l-orjentazzjoni tiegħu/tagħha ikun meqjus bħala ġenitur l-ewwel u qabel kollox u ma ssir l-ebda diskriminazzjoni bejn peruni LGBTIQ u dawk eterosesswali.
Adrian Delia qal li se jkun qed jagħti free vote lill-Grupp Parlamentari –żgur li mhux idea progressiva u qed jagħmel dan biex l-element qawwi ultra-konservattiv fil-Partit Nazzjonalista jkun aġevolat.
Il-konferenza tal-aħbarijiet kienet indirizzata wkoll mic-Chairperson ta’ ‘Equality Labour’ Clayton Cutajar fejn qal li wieħed mill-Principji ta’ Equality Labour hi li tiffoka fuq il-persuna rrispettavent mill-orjentazzjoni jew it-twemmin tal persuna. Fejn f’ dan id-dawl huwa kkundana l-kummenti ta’ esponenti nazzjonalisti dwar l-ugwaljanza u d-drittijiet civili.
“Dawn l-aħħar snin ta’ Gvern Laburista kienu importanti f’dawk li huma drittijiet ċivili”, qal Clayton Cutajar li qed imexxi Equality Labour. “Pajjiżna kien meqjus bħala wieħed anakronist fejn jidħol drittijiet ċivili iżda f’dawn l-aħħar snin ta’ Gvern Laburista saru avvanżi kbar biex minn pajjiż li kien meqjus bħala lura, kien deskritt bħala ‘a beacon of hope’.” Eżempju ta’ dan huma l-intorduzzjoni tal-Unjoni Ċivili, żwieġ indaqs kif ukoll l-liġi tal-identità tal-ġeneru.
