- Ħarġa ta’ bolla b’ kommemorazzjoni tal-Presidenza ta’ Malta tal-Kunsill tal-Unjoni Ewropea 2017
Malta għandha f’idejha l-Presidenza tal-Kunsill tal-Unjoni Ewropea, u biex jigi kkommemorat dan, se tinħareġ miniature sheet b’bolla waħda, għada l-Ħamis 12 ta’ Jannar 2017.
Din il-bolla għandha l-valur ta’ €3.59 u se tkun qiegħda turi l-logo li ġie magħżul ghall-Presidenza ta’ Malta tal-Kunsill tal-Unjoni Ewropea. Dan il-logo intgħażel minn numru ta’ sottomissjonijiet minn studenti, u juri interpretazzjoni kkulurita u differenti tas-Salib ta’ Malta. Il-bolla ġiet iddisinjata minn Sean Cini u hi ta’ daqs 31mm x 44mm, b’ perforazzjoni ta’ 13.9 x 14.0 (comb.) b’ watermark bis-slaleb ta’ Malta. Il-folja hija ta’ daqs 84mm x 84mm. Printex Limited ipprintja 20,000 miniature sheet.
Sabiex tikkumplimenta din il-bolla, MaltaPost u l-Bank Ċentrali ta’ Malta se jkunu qegħdin joħorġu prodott konġunt li jikkonsisti minn silver foil replica u munita kommemorattiva. Il-bolla tal- fidda turi l-bolla tat-€3.59 bil-kulur mill-ħarġa tal-‘2017 Maltese Presidency of the Council of the European Union’. Il-munita tal-fidda turi l-logo uffiċċjali tal-Presidenza ta’ Malta tal-Kunsill tal-Unjoni Ewropea tal-2017, u għandha dijametru ta’ 38.61mm b’ valur ta’ €10.00. is-set huwa ppreżentat ġo kaxxa flimkien maċ-ċertifikat ta’ awtentiċità.
Minn nhar il-Ħamis 12 ta’ Jannar, dawn il-prodotti se jkunu jistgħu jinxtraw minn kull Fergħa Postali. Ordnijiet jistgħu jsiru mis-sit elettroniku www.maltaphilately.com, bil- posta mill-Philatelic Bureau MaltaPost p.l.c. 305, Triq Ħal Qormi, Marsa, MTP 1001, bit- telefon 2596 1740 jew permezz tal-e-mail: info@maltaphilately.com.
