Id-dinja tax-xogħol żviluppat b’ mod mgħaġġel ħafna u dan anke għax is-soċjetà wkoll qed tinbidel b’ritmu mgħaġġel u dak li kien japplika lbieraħ żgur m’għadux jgħodd illum, aħseb u ara għada!
Il-qafas legali u s-suq tax-xogħol allura jridu jkunu pro-attivi biżżejjed u flessibli b’tali mod li jilqgħu għal sfidi ġodda, inkluż is-sigħat li nqattgħu fuq il-post tax-xogħol u l-flessibilità li x-xogħol jippermetti.
Fid-dawl ta’ dan u bi tħejjija għal Jum il-Ħaddiem, il-fergħa IDEAT fi ħdan il-Partit Laburista qed torganizza diskussjoni dwar jekk it-trejdunjins illum għadhomx relevanti permezz ta’ panel ta’ esperti mid-dinja tat-trejdunjoniżmu, ir-relazzjonijiet umani u dawk industrijali, li jinkludu lil Josef Bugeja, Segretarju Ġenerali tal-GWU, Diane Vella Muscat mid-DIER u rappreżentanti tal-ħaddiema f’kumpaniji kbar, fost oħrajn.
Fost l-oħrajn, se jiġi ttrattat kif il-ħidma tal-Gvern illum tassew tispikka fejn jidħlu ftehim kollettivi ġodda anke għal setturi li qatt ma ħlomna li jkollhom wieħed, flimkien mal-investimenti f’għodda u kundizzjonijiet aħjar tax-xogħol, bħala parti mill-impenji tiegħu favur l-aqwa riżorsa li għandu l-pajjiż, il-ħaddiem.
Id-diskussjoni se ssir nhar it-Tlieta, 8 t’April li ġej, fiċ-Ċentru Laburista fil-Ħamrun mill-5:30 p.m. ’il quddiem. Dawk interessanti jistgħu jirreġistraw billi jibagħtu imejl fuq segretarjat@partitlaburista.org.
