ONE News għandu informazzjoni li Paulina Maria Dembska kienet pjanata li tħalli pajjiżna jumejn qabel inqatlet iżda ż-żjara tagħha f’pajjiżna ġiet imġedda b’ġimagħtejn.
Dembska kienet f’pajjiżna bħala studenta u kienet qed tgħix f’hostel f’tas-Sliema, ftit ’il bogħod fejn instabet mejta fi ġnien l-Indipendenza.
Nifhmu wkoll li Dembska kienet tmur titma’ l-qtates li kienu jinġabru fil-ġnien u ta’ spiss kienet tkun fl-inħawi tal-ġnien.
Intant Gordon Manchè tar-River of Love ddistakka ruħu mis-suspettat li hu mifhum li ġieli attenda xi attivitajiet tar-River of Love.
Manchè saħaq li Abner Aquilina qatt ma kien parti mir-River of Love.
Rapporti qed jgħidu li s-suspettat qal lill-pulizija li huwa kien manipulat mix-xitan meta qatel lil Dembska.
Kien ONE News li kmieni t-Tnejn filgħodu żvela li l-persuna f’idejn il-pulizija b’rabta mal-qtil ta’ Pollakka ta’ 29 sena huwa Abner Aquilina.
Huwa għandu 20 sena, jgħix iż-Żejtun u huwa s-suspettat li qatel lill-mara.
Fi stqarrija l-Pulizija qalet li s-suspettat jjinsab fl-isptar Monte Karmeli u għalhekk il-Pulizija kellha tissospendi l-interrogazzjonijiet tas-suspettat.
Is-suspettat ittieħed l-isptar Mater Dei fejn ġie invistat minn tabib.
It-tabib irrefera lill-allegat qattiel lejn l-isptar tas-saħħa mentali.
Nifhmu li Abner Aquilina ġie arrestat mill-Pulizija wara li qajjem kommossjoni fil-Knisja tal-Balluta f’tas-Sliema.
Allegatament Aquilina tela’ fuq l-artal u qaleb sedja u leġiju.
Filwaqt li ħasad lil dawk kollha li kienu fil-Knisja jistennew biex tibda l-ewwel quddiesa tal-ġurnata, nifhmu li raġel li kien preżenti ħareġ lil Aquilina barra mill-Knisja.
F’dan il-waqt jista’ jagħti l-każ li Aquilina lissen xi kliem dwar l-omiċidju f’tas-Sliema.
Intant ftit tal-ħin wara li nstab il-katavru tat-tfajla, ONE News żvela li t-tfajla nstabet imneżża mill-ħwejjeġ u jista’ jkun li ġiet stuprata.
F’rasha nstabu wkoll xi ġrieħi.
Fil-fatt dettalji li għandu f’idejh ONE News juru li allegatament, is-suspettat stupra lit-tfajla u din mietet waqt l-allegat stupru.
Sorsi qrib l-investigazzjonijiet żvelaw ma’ ONE News li persuna lemaħ liż-żagħżugħ suspettat fuq it-tfajla u din la bdiet tgħajjat u lanqas tirreżistih.
Nifhmu li awtopsja li saret fil-jum tat-Tnejn fuq il-katavru għandha tistabilixxi iżjed fatti.
Sa issa l-Pulizija qed timxi fuq it-teżi li s-suspettat u l-vittma ma kinux jafu lil xulxin.
Il-Pulizija qed tinvestiga fejn kien is-suspettat qabel is-sejba tal-katavru fi ġnien l-Indipendenza f’tas-Sliema.
