Għal jum ieħor, qed tkompli tirrenja ċertu skuntentizza u qed jikber il-ġlied fil-grupp parlamentari Nazzjonalista.
L-impressjoni li l-Kap Bernard Grech qed jipprova jagħti li ġie hu u issa qed issaltan l-għaqda mhiex minnha kif qalulna s-sorsi tagħna fl-istamperija f’tal-Pietà.
Is-sorsi tagħna qalulna li l-fazzjonijiet, ta’ Simon Busuttil u ta’ Adrian Delia qed jerġgħu jqumu u jsaħħnu l-irjus dwar is-saga ta’ Jason Azzopardi f’Tel Aviv.
Jum wara li xandarna l-kummenti t’Adrian Delia fuq ir-radju tal-Partit Nazzjonalista stess, fejn dan ma qagħadx lura biex jizzika lil Jason Azzopardi u jitfalu l-botti wara li Azzopardi ħa kamra mħallsa mill-grupp ta’ Yorgen Fenech f’lukanda lussuża fl-Iżrael, issa qed inxandru kummenti ta’ Delia li ta lil ONE News barra l-Parlament.
B’ton sarkastiku, Delia mal-ewwel fakkarna min hu sieħbu.
Meta kien mistoqsi: “Inti x’jidhirlek dwar dak li ġie żvelat ilbieraħ f’midja indipendenti dwar sieħbek Jason Azzopardi?”
Delia qalilna “Sieħbi … [imsomma]”
Jason Azzopardi kien il-perċimess biex Adrian Delia jitwarrab minn Kap u floku jsir Bernard Grech.
Fil-fatt Jason Azzopardi u l-fazzjoni ta’ Simon Busuttil riedu ras Delia wara li ġie allegat li dan ħa flus m’għand Yorgen Fenech biex tiġi mminata l-kampanja elettorali ta’ David Casa fl-aħħar elezzjoni għall-Parlament Ewropew.
Ma’ ONE News, Delia li lanqas irid li jkun parti mix-shadow cabinet ta’ Bernard Grech, fetħlilha kontra Jason Azzopardi dwar meta tah bis-sieq is-sajf li għadda.
Meta kien mistoqsi: “Jason kien ftit tax-xhur ilu qajjem oppożizzjoni qawwija kontrik anke wara li fil-midja ħareġ anki ssemmew rabtiet li seta’ int kellek ma’ Yorgen Fenech. Huwa kredibbli Jason illum?”
Delia wieġeb: “Naħseb ma kienx kredibbli dakinhar u jiena għedtha b’mod għall-inqas fuq din il-materja, għax meta qal li kellu jgħid anki fil-grupp parlamentari, jiena kont ċar daqs il-kristall u hija xi ħaġa sempliċi ħafna, jekk inti għandek prova mqar waħda, ġib il-prova.”
Filwaqt li Bernard Grech ħareġ għonqu u ddefenda bil-qawwa lil Jason Azzopardi billi qal li dan huwa politiku li għamel ħafna ġid, Delia għajjar giddieb lil Jason Azzopardi.
Delia qal: “Imma li l-ewwel li tigdeb fuq in-nies, imbagħad tħammeġ in-nies, imbagħad tibqa’ tippersisti imbagħad tgħid il-falz. Naħseb dak mhuwiex kompartament serju.”
