L-eks Kap Nazzjonalista Adrian Delia sfida lill-Kap Nazzjonalista preżenti Bernard Grech, li qallu li l-mossa li għamel fuq il-Fosos nhar it-Tnejn kienet inaċċettabbli.
Mat-Times, Delia ġie rappurtat jiċħad li għamel ‘show of force’ fl-attività tal-Kap b’rabta mal-festi tal-Indipendenza.
“Ma nistax nifhem kif għax tattendi attività tal-partit fejn jitkellem il-Kap fid-diskors annwali tal-festi tal-Indipendenza, tiġi interpretata bħala mod kif timmina l-Kap”, saħaq Delia mat-Times.
“Il-loġika tgħidlek li kont timmina lil Kap kieku għamilt jew ħdimt għal bojkot jew tmur tfixkel l-attività, mhux tinkoraġixxi lin-nies jattendu”, irrimarka l-eks Kap Nazzjonalista.
F’messaġġ ċar lejn Bernard Grech, Delia qal li n-nies tiegħu, li marru lebsin il-flokkijiet bil-kliem ‘Team Adrian Delia’ huma nies li verament iħobbu lill-Partit Nazzjonalista.
Adrian Delia żied jispjega, “Jien lanqas tlajt il-Fosos magħhom iżda mal-jum ħeġġiġt in-nies jattendu għall-attività tal-partit u kif wasalt il-Fosos sibt dan il-grupp ta’ nies.”
Delia rrimarka li jispera li fil-futur deputati u kandidati oħra jħeġġu lin-nies jattendu biex jassiguraw li l-attivitajiet tal-partit ikunu suċċess.
Delia saħaq ukoll li mill-partit ma kellmu ħadd fuq dak li ġara l-Fosos it-Tnejn filgħaxija, fejn rapporti qalu li n-nies tal-fazzjoni tiegħu spiċċaw anki jibbujaw xħin tkellem Bernard Grech.
In-nies ta’ Delia anki qagħdu lura fuq il-Fosos u ma tħalltux man-nies l-oħra preżenti.
Għal dan kollu l-Kap Bernard Grech ikkonferma dak li rrapporta ONE News, li t-tmexxija Nazzjonalista kienet urtata bix-‘show of force’ ta’ Delia li spiċċat serqet l-attenzjoni u riżultat ta’ hekk, ħadd ma ta kas x’qal il-Kap f’attività tant importanti għall-Partit Nazzjonalista.
Fil-fatt Bernard Grech kien qal lil Delia li dak li għamel kien inaċċettabbli: “Nibqa’ ninsiti li dawn it-tip ta’ azzjonijiet għalija ma humiex aċċettabbli. Aħna partit wieħed b’bandiera waħda u arma waħda u allura hemm bżonn li kulħadd jiġbed l-istess ħabel.”
Grech ma waqafx hemm u wissa lil Delia għax skontu kiser ir-regoli tal-partit: Spjega, “Aħna anke fir-regoli tagħna għandna li ma jistgħux l-ebda kandidat li jkollu dawn it-tip ta’ flokkijiet u affarijiet.”
