L-eks Kap Nazzjonalista, illum deputat Nazzjonalista mhux parti mix-shadow cabinet tal-Kap preżenti Bernard Grech, sostna li hemm nies li huma mażżra mal-Partit Nazzjonalista.
Adrian Delia kien qed jiġi intervistat mill-ġurnalist t’esperjenza Reno Bugeja fuq programm online tal-Media today, meta beda jitfa’ l-botti lejn dawk tal-fazzjoni ta’ Simon Busuttil li qaċċtuh minn Kap u poġġew lil Bernard Grech fit-tmexxija tal-Partit Nazzjonalista.
Delia qal, “It-tibdiliet biex dawk kollha li huma mażżra mal-Partit Nazzjonalista jitwarrbu u ndaħħlu nies ġodda.”
Il-ġurnalist staqsa, “Min huma tal-mażżra?”
“Mhuwiex xogħli li noqgħod nidentifika llum”, wieġbu Delia.
Delia ġie mistoqsi dwar il-lobby groups bħal tar-Repubblika u l-Occupy Justice, li issa reġgħu daħlu fil-Partit Nazzjonalista biex jiddettaw l-aġenda tal-partit.
Reno Bugeja staqsa, “Imma qed jinfluwenzaw lill-partit bħalissa?” u Delia qal, “Naħseb illi iva.”
Delia elabora iżjed ma’ dak li kien qed jgħid u qal li tar-Repubblika u l-Occupy Justice u d-Deputati li jkunu magħhom, bħal Jason Azzopardi u Karol Aquilina fost oħrajn, ma riduhx anki meta rifes għall-ewwel darba l-għatba tad-Dar Ċentrali biex jikkontesta għall-Kap.
Il-ġurnalist qal lil Delia, “Kellek nies bħal tar-Repubblika u l-Occupy Justice li ma ridux jafu affari miegħek.”
Delia wieġeb, “Ċertament, mhux hawn min jgħid, dak huwa fatt. Kien hemm min minn day one, anzi qabel ma tlajt ma kienx kuntent bil-preżenza tiegħi fil-Partit Nazzjonalista.”
Fuq l-istess tema imbagħad qal li Manuel Delia, ieħor tar-Repubblika u l-Occupy Justice li jikteb il-blogs biex jgħid x’għandu jagħmel Bernard Grech, huwa giddieb.
Delia qal, “Jiena ma nsegwix lil Manuel Delia għax persuna illi naf illi gideb frekwentament fil-konfront tiegħi u m’għandix għalfejn insemmih.”
Delia ma qagħadx lura jibgħat botti fini lit-tmexxija Nazzjonalista u jgħidilha li l-aħħar żewġ stħarriġ urew kif il-Partit Nazzjonalista baqa’ fl-istess ilma.
Bugeja rrimarka, “Xħin tqis it-trust rating xorta għadna fl-istess sitwazzjoni li konna fl-2017.”
Delia wieġeb, “Hekk hu, hekk hu għax meta tagħmel il-kalkoli hekk hu u għalhekk jiena li qed ngħidlek hu lil hinn milli ninħlew x’qed jiġri fl-aħħar xhur u x’ġara fl-aħħar sentejn jew tlieta, trid tanalizza l-problema iktar ’il bogħod.”
Delia kien ċar u qal li hu ma ngħatax żmien biżżejjed.
Hu qal, “Ma ngħatajtx żmien biżżejjed u m’iniex inkun apoloġetiku.”
Fuq il-programm li kompla jesponi iktar il-firda li tibqa’ tippersisti fil-Partit Nazzjonalista, illum immexxi minn Bernard Grech, lid-deputati u esponenti tal-establishment Nazzjonalista li qatgħulu saqajh kemm il-darba, Adrian Delia fakkarhom x’għamlulu.
Delia qal, “Dawk illi qalu hekk fl-aħħar tliet snin x’għamlu biex għenu lill-Partit Nazzjonalista. X’għamlu biex appoġġjaw il-xi ħadd illi ma kienx qiegħed fil-Parlament diġà, ma kienx qiegħed fil-qalba tal-partit diġà u pprova jagħmel l-affarijiet b’mod differenti meta evidentament l-affarijiet kif kienu qabel, kienu fallew u bi kbir.”
Delia ħa l-opportunità li kellu u reġa’ bagħat messaġġ li hu se jkun kandidat Nazzjonalista, anki jekk hemm min fil-Partit ta’ Bernard Grech, ma jridux joħroġ.
Lil Beppe Fenech Adami għamilielu ċara li hu kandidat fuq it-tmien distrett u saħansitra ħa joħroġ fuq ieħor.
Bugeja staqsa, “F’liema distretti qed taħdem?” u Delia wieġeb, “Jiena fit-tmien distrett.”
Il-ġurnalist kompla, “Biss, hemmhekk ħa tikkontesta?”
“Le ħa nikkontesta tnejn imma t-tmien distrett s’issa”, qal Delia.
Delia saħaq ukoll li David Casa u David Thake ma kellhomx provi x’jissostanzjaw meta ġie allegat li l-eks Kap ħa flus m’għand Yorgen Fenech biex tiġi mminata l-kampanja elettorali ta’ Casa.
Delia qal, “Kien xehed David Casa innifsu illi qal illi m’għandu prova ta’ xejn. Kien xehed David Thake illi kien qal illi dak illi kien sema’ mingħand xi ħadd li qallu m’għand xi ħaddieħor ċertament ma kienx jirrigwarda l-Kap tal-partit Adrian Delia.”
Imbagħad meta mistoqsi fuq min hu miġġieled miegħu, fosthom Jason Azzopardi, Delia ma qagħadx jogħmodha, u spiċċa kif beda, jiftaħ il-kanuni fuq min illum qiegħed wara Bernard Grech.
Qal, “Jekk tgħidli imbagħad issemmili individwi personali jekk għandiex relazzjoni tajba ma’ xi ħadd illi gideb fuqi, assolutament le, mhux hekk?”
