F’Ġimgħa oħra ta’ ġlied intern, problemi, u inkwiet għal Kap Nazzjonalista Adrian Delia, il-Ħadd filgħodu meta għamel l-kummenti politiċi tiegħu ftit li xejn kellu xi jgħid.
Nieqes mill-ideat u s-sustanza politika, Adrian Delia għazel li jmur fuq il-midja Nazzjonalista u jikkritika lill-Gvern fejn tidħol l-ekonomija. Qal li għamilna surplus għal xejn.
Ġimgħa ‘l bogħod mill-preżentazzjoni tal-Baġit għas-sena d-dieħla, Adrian Delia sejjaħ lil dan il-Gvern bħala għami u qal li ninsabu f’sitwazzjoni fejn f’pajjiżna hawn in-nies qegħdin jgħajjtu biex jgħixu.
Adrian Delia għażel li jinjora l-mizuri soċjali li daħħal dan il-Gvern, bl-aktar riċenti ikun is-servizz tat-trasport b’xejn għall-istudenti li jmorru l-iskejjel tal-knisja u indipendenti.
Fil-litanija negattiva tas-soltu, Adrian Delia ikkonferma li huwa jrid imur kontra parir tal-Parlament Ewropew, l-aktar dak tal-Kumitat LIBE, li tant juża, li l-Gvern Malti jmur quddiem il-Kummissjoni Venezja, kif ġieli sar, sabiex isiru r-rakkomandazzjonijiet kollha li jkun hemm bżonn u jsir it-tibdil jekk ikun meħtieg.
Il-Ministeru għall-Ġustizzja fi stqarrija qal li diskors tal-Kap tal-Oppożizzjoni reġa kien wieħed diviżiv u miżgħud b’attakki fuq istituzzjonijiet kemm lokali u internazzjonali.
F’pajjiżna tirrenja r-rule of law, u għalhekk, kwalunkwe attakk fuq l-Avukat Ġenerali minħabba l-użu li għamel tal-awtorità li ttih il-liġi huwa ħażin u mhux xieraq.
Kull min jippretendi reviżjoni ta’ deċiżjoni li tittieħed abbażi tal-liġi għandu jagħmel użu mid-dritt li jmur il-qorti, kif wara kollox qed jagħmel l-istess Kap tal-Oppożizzjoni fil-konfront tal-Avukat Ġenerali. Li wieħed jattakka l-persuni u l-istituzzjonijiet hija t-triq ta’ min jimmina s-saltna tad-dritt u mhux iħarisha.
Bl-istess mod, il-Gvern ma jaqbilx mas-sustanza tad-diskors u t-ton li uża l-Kap tal-Oppożizzjoni fil-konfront tal-Kummissjoni ta’ Venezja. Din hija Kummissjoni li l-Gvern diġà għamel użu mis-servizzi tagħha ta’ għoti ta’ pariri tekniċi, u assolutament m’għandu ebda problema li jagħmel użu mill-pariri tagħha għal iktar tisħiħ tas-saltna tad-dritt.
Il-Ministeru għall-Ġustizzja żied jgħid li r-riformi fis-settur tat-tisħiħ tas-saltna tad-dritt se jkomplu indipendentament mill-attitudni negattiva tal-Kap tal-Oppożizzjoni.
Fi stqarrija, il-Partit Laburista nnota li Adrian Delia donnu waqa fil-muta u ma lissinx kelma waħda dwar dak li ħareġ fuq il-gazzetti lokali. Bil-Malta Independent ippublikat kif l-allegat telefonata minn Pierre Darmanin lill-Ministru Chris Cardona ma seħħitx, għal kuntrarju ta’ dak li ġie allegat minn Daphne Project.
Il-Partit Laburista qal li dan jirriżulta aktar minn qatt qabel kemm Adrian Delia għandu problema bil-kredibiltà. Bħal politiku amateur, Delia jkun pront jaqbeż fuq rapport li jogħġob lilu iżda mbagħad jistaħba għal kollox mal-ewwel sinjal li jkun reġa żbalja, temmet tgħid l-istqarrija tal-Partit Laburista.
