Adrian Delia għamel konferenza tal-aħbarijiet jitkellem fuq ir-rapport tal-Awditur Ġenerali fejn deher ċar li lanqas biss qrah. L-investigazzjoni tal-Awditur Ġenerali dwar il-power station il-ġdida ġabet fix-xejn il-kampanja negattiva u distruttiva tal-Partit Nazzjonalista dwar dan il-proġett. Qal dan fi stqarrija l-Partit Laburista.
Il-PL spjega kif minkejja dan Adrian Delia llejla wera li jrid ikompli fejn ħalla ta’ qablu u lanqas staha li miegħu biex jitkellem fuq rapport tal-Awditur Ġenerali ħa lil Jason Azzopardi li skont l-Awditur Ġenerali messu ilu li rriżenja. Ir-rapport tal-Awditur Ġenerali dwar il-power station huwa wieħed estensiv. Iżda fis-sommarju tiegħu jagħmel konklużjonijiet ċari li wieħed ma jistax jinjorahom.Adrian Delia qal li l-poplu qed iħallas €200 miljun iktar fis-sena. Din hi analiżi superfiċjali ta’ min jew ma jifhimx jew inkella irid iqarraq. Biex isib proġett li bih il-poplu mar ħażin fuq kull livell Delia aħjar jaqra r-rapport tal-Awditur Ġenerali fuq il-BWSC fejn tidher ukoll xamma kbira ta’ korruzzjoni. Qal dan il-Partit Laburista.
Spjega kif l-Awditur Ġenerali kkonferma kif dan kien proġett meħtieġ kemm għas-sigurtà fil-provvistà kif ukoll biex pajjiżna jneħħi darba għal dejjem id-dipendenza minn fuq l-iktar żejt li jniġġeż. Dan biex minflok jibda juża enerġija nadifa prodotta mill-gass.
L-Awditur imkien ma jaqbel mal-argument li ilu jsir mill-Partit Nazzjonalista li dan seta kien xi proġett mhux bżonnjuż. Anzi, jgħid li l-gvern kien qed jimxi mal-politika tal-enerġija mfassla fl-2012. Ir-rapport wera biċ-ċar kif il-konsorzju tal-ElectroGas kellu l-offerta li tat lill-poplu Malti l-inqas prezz tal-enerġija fost dawk li ħadu sehem fil-proċess kompettitiv.
Iktar minn hekk l-NAO qies id-dokument tar-Request for Proposals bħala wieħed strutturat u li jipprovdi bażi soda għal min ried jitfa l-offertà. Proċessi ta’ klarifikazzjoni mmexxija mill-Enemalta kienu meqjusa bħala strutturati u dokumentati tajjeb. L-uffiċċju qies dawn il-miżuri bħala proċessi li jwasslu għal trasparenza u ġustizzja.
L-istqarrija tgħid kif każi ta’ kunflitt ta’ interess allegati mill-Partit Nazzjonalista wkoll ma kienux ikkonfermati u l-Awditur Ġenerali nnota wkoll l-iskrutinju wiesgħa li għamlet il-Kummissjoni Ewropea. L-NAO jirrikonoxxi li l-Kummissjoni Ewropea kienet ċara li ma nkisrux ir-regoli Ewropew bl-għoti tal-kuntratt lil Electorgas u dak li ħadet l-Electrogas huwa fl-istess livell ta’ dak li jieħdu kumpaniji oħra fi proġetti simili.
Il-PL qal li l-Awditur ikkonferma wkoll li l-gvern għamel dħul raġonevoli għall-garanzija bankarja li kien għamel b’mod temporanju. Biex hawn ukoll ġab fix-xejn kampanja tal-Partit Nazzjonalista.
L-NAO jgħid li ukoll li ma teżisti ebda evidenza li ssostni dak li jgħid l-eks Kap tal-Oppożizzjoni li dwar dan il-proġett seta’ kien hemm xi ftehim qabel l-elezzjoni ġenerali.
Il-PL temm l-istqarrija billi qal li fi ftit kliem ir-rapport tal-NAO jifqa’ ħafna mill-bżieżaq tal-Partit Nazzjonalista. Biex għal darb oħra rriżulta li l-PN kien qed jibbaża l-argumentazzjoni politika fuq il-baħħ u l-allegazzjonijiet vojta.
