Il-Kunsill Malti għall-Arti, li qed jagħlaq għaxar snin, se jingħata dehra ġdida.
Dan tħabbar waqt konferenza l-Ħamis filgħodu, fil-preżenza tal-Ministru għall-Wirt Nazzjonali, l-Arti u l-Gvern Lokali, Owen Bonnici, fejn ukoll ġie żvelat il-pjan t’azzjoni li se jimxi miegħu l-Kunsill din is-sena.
Hekk kif l-aħħar għaxar snin raw lill-Kunsill Malti għall-Arti jinvesti f’eċċess ta’ aktar minn €28 miljun fi sforz biex jikber is-settur u jrendih bħala industrija professjonali u ekonomikament vijabbli, il-Kap Eżekuttiv Albert Marshall spjega kif, sa ftit ta’ snin ilu, il-pajsaġġ kulturali lokali kien għadu fl-istadji tal-bidu tal-iżvilupp tiegħu.
Filwaqt li issa qed jimxi ’l quddiem b’approċċ strateġiku u komprensiv, b’kunċett li għadu qed jissawwar.
Marshall semma kif kulħadd qed jifhem li l-Kunsill mhux qiegħed hemm biex iħalli l-arti bħala xi ħaġa li wieħed jopera fiha bħala dilettant biss, imma dawn l-artisti jingħataw l-għodod kollha possibbli biex joħolqu wkoll karrieri minnha.
“Dawn kienu 10 snin intensivi ta’ progress kontinwu. Il-kunċett ta’ kif namministraw il-kultura tal-pajjiż inbidel, twessa’, għax l-artist illum f’Malta għandu opportunitajiet kif qed taraw warajja, b’dak li qed taraw warajja hu simbolu ta’ bieb miftuh beraħ għal min irid jaħdem fis-settur u l-kunsill qiegħed hemm biex jiffaċilita karriera fl-arti.”
Albert Marshall, Kap Eżekuttiv, KMA
Waqt il-preżentazzjoni, il-Ministru Bonnici semma diversi inizjattivi li ttieħdu għall-artisti u s-settur, b’mod ġenerali, bħar-rata ta’ taxxa ta’ 7.5% għall-prattikanti kreattivi li jaħdmu għal rashom u tnaqqis fit-taxxa ta’ 150% għal donazzjonijiet kulturali.
Tkellem ukoll dwar l-aċċess taż-żgħażagħ għall-kultura permezz ta’ inizjattivi bħall-Culture Pass u kif din is-sena se jiġu investiti €7 miljun fil-programm ta’ finanzjament biex ikompli jiġi xprunat it-tkabbir sostenibbli fis-settur.
“Illum qed nimmarkaw għaxar snin mindu twaqqaf il-Kunsill Malti għall-Arti, fil-forma li għandu illum. Jekk hemm xi ħaġa tajba ħafna li wettaq il-Kunsill f’din il-ġenerazzjoni kien l-inkubatur ta’ ħafna u ħafna ideat u anke entitajiet sħaħ, li llum telqu jiġru għal rashom, li jagħmlu differenza fis-settur kulturali. Għad fadal ħafna xi jsir f’dan is-settur u aħna determinati li nkomplu ngħollu l-istandards tagħna u nkomplu npoġġu lill-artist u lill-kreattiv fiċ-ċentru tal-ħidma tagħna.”
Il-Ministru, Owen Bonnici
Ġie spjegat kif din is-sena, il-Kunsill Malti għall-Arti se jamministra 23 skema ta’ finanzjament u 35 sejħa, li jindirizzaw diversi oqsma relatati, inkluż il-promozzjoni tal-arti lokali madwar id-dinja, fejn ukoll twaqqaf direttorat ġdid, li se jkun immexxi minn Annabelle Stivala.
