Wara li għal snin twal tħalla fi stat ta’ abbandun, Ġnien tal-Kmand ġewwa ż-Żejtun ingħata dehra friska u ġdida hekk kif għadda minn proġett ta’ riġenerazzjoni b’investiment ta’ tletin elf ewro.
Ix-xogħol jinkludi titjib tal-mogħdijiet u l-passaġġi, kif ukoll restawr ta’ ġibjun antik li jinsab ġewwa dan il-ġnien li nbena fis-snin bikrin tas-seklu dsatax.
Dan il-ġnien, li kien ikkummissjonat mill-Kummissarju Ċivili Ingliż Alexander Ball, huwa wieħed mill-ftit ġonna li nbena minnu li għadu ippreservat f’pajjiżna.
Is-Sindku taż-Żejtun, Doris Abela spjegat kif tħawlu madwar tmien mitt siġra u arbuxella, bil-għan li jkompli jitkabbar u jiġi rrestawrat l-abitat naturali ambjentali tal-lokalità.
Abela spjegat li parti mill-ġnien ġie allokat għan-naħal li se ikun qed jieħu ħsieb biex idakkar in-naħla Maltija bil-għan li jsaħħaħ il-preżenza tan-naħla Maltija.
Hija qalet, “Apparti l-fatt li se jkun ġnien biss, hawn għandna persuna li qed tingħata permess biex idakkar in-naħla Maltija. Għandu kamra, fejn konna iffirmajna ftehim sa minn l-elfejn u sittax.”
Filwaqt li faħħret ix-xogħol stupend tal-ħaddiema fi ħdan Ambjent Malta, is-Sindku Żejtunija sostniet li issa huwa importanti ħafna li dan il-proġetti jiġi apprezzat u jinżamm fi stat tajjeb minn min jiffrekwentahom u jużahom.
Waqt l-inawgurazzjoni ta’ dan il-Ġnien, il-Ministru għall-Wirt Nazzjonali, José Herrera sostna kif il-Gvern qed ikun ta’ għajuna għall-Kunsilli Lokali biex permezz ta’ skemi ta’ fondi maħruġa, isiru proġetti fil-komunitajiet.
Il-Ministru Herrera semma wkoll kif ir-reġjuni se jkunu qed jgħinu lill-Kunsilli Lokali biex japplikaw għal skemi ta’ finanzjament.
