Il-bord tal-etika u mġiba tal-Partit Nazzjonalista mistenni jaqtaha favur Jason Azzopardi li qed jiġi investigat l-aġir tiegħu wara li kien ġie żvelat li mar Tel Aviv u l-kamra f’lukanda lussuża ħallasielu l-grupp tas-suspettat mandant fil-qtil ta’ Daphne Caruana Galizia, Yorgen Fenech.
Dan stqarru l-Kummentatur politiku Simon Mercieca li ta dettalji dwar laqgħa li kellu Jason Azzopardi mal-bord mhux indipendenti iżda fi ħdan il-Partit Nazzjonalista.
Skont Mercieca, Jason Azzopardi quddiem il-bord tal-etika, ħa miegħu lid-deputat Nazzjonalista David Thake, ieħor li jippriedka ħafna fuq il-governanza u s-saltna tad-dritt.
Ma’ ONE News, meta kien ġie żvelat il-każ, David Thake kien laqa’ ħafna għal Jason Azzopardi u prova jbenġhielilu billi qal li Azzopardi xtara rigal lura lil ta’ Fenech għaliex tħallsitlu l-kamra fil-lukanda Hilton max-xatt ta’ Tel Aviv.
Thake stqarr: “M’aċċettax ir-rigal, li għamel kif mar Malta qabad, xtara rigal tal-istess ammont u tah lil Yorgen Fenech.”
Ftit wara li Thake kien għamel din id-dikjarazzjoni, il-Kummissarju għall-Istandards fil-Ħajja Pubblika George Hyzler ta ċamata lil Jason Azzopardi propju anki fuq il-fatt li prova jbenġel ir-rigal li ħa m’għand ta’ Fenech billi qal li xtara rigal lura.
Hyzler qal li dak li qal Jason Azzopardi u li fl-istess sens, qalu David Thake ma’ ONE News ma jgħoddx għaliex jekk deputat jingħata rigal u jirreċiprokah b’rigal min-naħa tiegħu, dan ma jikkanċellax ir-rigal mogħti lid-deputat.
Hyzler qal ukoll li t-talba ta’ Jason Azzopardi biex jinvestigah kienet superfluwa anki fl-isfond li Hyzler kien prekluż mil-liġi minħabba l-każ inkwistjoni ġara qabel inħoloq bil-liġi l-uffiċċju tal-Kummissarju għall-Istandards fil-Ħajja Pubblika.
Intant il-bord tal-Partit Nazzjonalista li ġie kompromettat minn Bernard Grech fejn iddefenda lil Jason Azzopardi u qal li dan huwa politiku li għamel ħafna ġid, mistenni jagħti tbeżbiża lil Jason Azzopardi għal għajn in-nies.
Simon Mercieca qal li l-midja qrib il-paladini tar-‘rule of law’ u ‘good governance’ ser ikunu qed ibenġlu l-affarijiet dwar Jason Azzopardi f’dik li bl-Ingliż tissejjaħ ‘a damage control campaign’.
Dan fl-isfond li Jason Azzopardi għandu ħafna skeletri fil-gwardarobba, bil-gazzetta Illum kienet stqarret li dan għandu litanija ta’ servizzi b’xejn.
Intant ftit qabel ġie żvelat li Jason Azzopardi mar Tel Aviv f’lukanda mħallsa, li ftit iljieli jiswewk l-eluf ta’ ewro, meta kien mistoqsi fuq ix-xandir nazzjonali jekk hu ħax xi ħaġa mill-grupp li fih kien hemm involut Yorgen Fenech, Jason Azzopardi kien qal hekk:
Meta kien mistoqsi: “Mill-grupp li huwa kien CEO int pereżempju qatt ma ħadt xejn mingħandhom pereżempju lil dawn, il-grupp?”
Azzopardi kien wieġeb: “Żgur mhux mingħand Yorgen Fenech.”
Meta reġa’ kien mistoqsi: “Le mill-grupp, qed nistaqsik qed inkun preċiż bħal Avukat jien, qatt ħadt xi ħaġa?”
Azzopardi tenna: “Ma niftakarx li qatt ħadt xi ħaġa.”
Il-Preżentatur saħaq: “Qatt ma ħadt xi ħaġa.”
