Il-membru parlamentari ewropew nazzjonalista David Casa kiser regoli ewropej, meta daħħal lil zijuh u lir-raġel ta’ oħtu jaħdmu bħala assistenti lokali tiegħu.
Biz-żewġ irġiel jinsabu fil-lista ta’ persuni li jieħdu paga mill-Parlament Ewropew.
Paul Degabriele, li jiġu z-ziju ta’ Casa u Etienne Zammit Guglielmi ,li jiġi r-raġel ta’ oħt Casa, Dorianne, qegħdin imniżżla fid-dikjarazzjoni ta’ trasparenza li ppreżenta l-membru parlamentari ewropew nazzjonalista.
Dan ġie żvelat mill-Malta Today hekk kif meta kien qiegħed iwieġeb għal mistoqsijiet ta’ din il-gazzetta, David Casa ma ċaħadx li daħħal lill-qraba tiegħu jaħdmu miegħu.
Żied li l-ħaddiema li jaħdmu miegħu huma skont ir-regoli tal-Parlament Ewropew u m’hemm l-ebda ksur kif qiegħed jiġi implimentat mill-Malta Today.
Iżda hawn David Casa inqabad f’gidba.
Dan għaliex il-Malta Today irraportat li fis-sit eletroniku tal-Parlament Ewropew hemm miktub ċar u tond li membri parlamentari ewropej ma jistgħux jimpjegaw qraba tagħhom bħal assistenti.
Sabiex jiddefendi ruħu fit-tweġibiet tiegħu, David Casa deffes fin-nofs lil membru parlamentari ewropew nazzjonalista, Roberta Metsola, li skond il-Malta Today ukoll qiegħda timpjega lir-raġel ta’ oħtha bħala assistent tagħha.
Is-sena li għaddiet kien żvelat li l-membri parlamentari ewropej nazzjonalisti kienu qegħdin jikru l-uffiċini tagħhom fid-Dar Ċentrali u jħallsu lill-Partit Nazzjonalista erbat elef ewro fix-xahar.
Huma kienu qalu li l-ftehim għal kiri tal-uffiċini kien sar ma’ Media Link Communications, li hija kumpanija.
F’dan il-każ ukoll, regoli ewropej jagħmluha ċara li fondi ewropej ma jistgħux jintużaw sabiex b’mod dirett jew indirett jingħataw lill-partiti politiċi.
Bl-uffiċjal għat-trasparenza tal-Unjoni Ewropea, Nick Aiossa kien qal li dawn l-allegazzjonijiet għandhom jiġu riferuti għand l-OLAF.
