Norbert Attard ikompli l-parteċipazzjoni tiegħu fil-Modus Super Series tad-Darts
Il-plejer lokali tad-darts Norbert Attard kompla bl-impenji tiegħu fil-Modus Super Series Darts Tournament li qed isir fil-belt Ingliża ta’ Portsmouth hekk kif intlagħbet it-tieni ġurnata ta’ logħob.
Sfortunatament Attard tilef l-erba’ logħbiet li lagħab bl-istess skor ta’ 4-0 kontra John Henderson, Andreas Harryson, Bradley Roes u Chris Wickenden.
Attard, li ma kienx fl-aqwa kundizzjoni fiżika possibbli, sabha ferm diffiċli sabiex ikompli mal-qawwa tal-avversarji li min-naħa tagħhom kienu preċiżi fit-tefgħat tagħhom.
Wara t-tieni ġurnata ta’ logħob, Norbert Attard għandu sitt punti wara t-tliet rebħiet li kiseb fil-ftuħ tat-turnament.
Sadanittant, illum Attard ikun fl-azzjoni għat-tielet darba fejn jerġa’ jilgħab kontra l-istess avversarji bit-tama li jikseb aktar rebħ u jitla’ aktar ‘il fuq fil-klassifika.
KLASSIFIKA – MODUS SUPER SERIES
Andreas Harryson 16, John Henderson, Bradley Roes 12, Andreas Jorgensen 8, Chris Wickenden, Norbert Attard 6.
