Floriana Ajax rebħu l-logħba tant mistennija mill-ewwel ġurnata tal-kampjonat tal-Ewwel Diviżjoni tad-darts meta għelbu lil Ħamrun Education Bar 5-3. Dawn iż-żewġ mistennija jkunu fost l-isfidanti għar-rebħ tat-titlu.
Wara li sabu ruħhom 1-0 minn taħt, il-Furjaniżi rebħu l-erba’ games ta’ wara, bil-Ħamruniżi li wettqu reazzjoni sabiex jagħmlu l-iskor 4-3. Fl-aħħar game deċiżiva tad-doubles kienu l-koppja Jonathan u Omar Aquilina li għelbu lil Brian u Godfrey Abela sabiex ħadu l-ewwel punti tal-istaġun.
Ħamrun Bayern A rebħu t-tieni tim proprja tagħhom Ħamrun Bayern B 5-3 filwaqt li Manchester Conquest Pub ixxalaw u għelbu lit-tim promoss ta’ Top Gun Bar 7-1.
Il-logħba bejn Sliema Inter u Fgura Kenky A kienet ferm bilanċjata bl-iskor ta’ 4-4 jixhed dan kollu.
Mit-tieni diviżjoni, PO’s Bar bdew l-impenji tagħhom b’rebħa ta’ 7-1 kontra Mqabba tal-Ġilju filwaqt li Fgura Maypole u Beland Żejtun spiċċaw fi dro ta’ 4-4.
Mit-tielet diviżjoni, Duke’s B għelbu lil Duke’s A 5-3 filwaqt li Birgu Boċċi Club kellhom debutt mill-aqwa wara li għelbu 8-0 lil Leah’s Bar.
Domus Żejtun immarkaw ir-ritorn tagħhom fid-darts lokali bl-aqwa mod possibbli wara skor konvinċenti ta’ 7-1 kontra Mqabba FC.
