Il-Qorti laqgħet it-talba għall-ħelsien mill-arrest ta’ Darren Debono.
Dan hekk kif kompliet tinstema’ l-kumpilazzjoni fil-konfront ta’ żewġ eks-plejers internazzjonali tal-futbol Darren Debono u Jeffrey Chetcuti li huma mixlija b’każ li qed jiġi deskritt bħala l-akbar reat tax-xorta tiegħu u li jinvolvi l-ħasil ta’ miljuni ta’ ewro.
Debono ngħata l-ħelsien mill-arrest fuq depożitu ta’ ħamsin elf ewro u garanzija personali ta’ mitejn elf ewro kif ukoll li ma jistax isiefer u li ma jistax jersaq għaxar metri lejn il-kosta.
Il-kumpilazzjoni tal-provi bdiet f’Novembru li għadda u Chetcuti kien ingħata l-libertà proviżorja iktar kmieni din is-sena.
It-Tlieta fil-Qorti xehdu għadd ta’ eks-impjegati tal-kumpanija World Water Fisheries li kien jieħu ħsiebha Debono.
Il-kontrollur finanzjarju tal-kumpanija, Charles Farrugia, xehed fil-Qorti li ma kienx ħa kompletament l-irwol meta telaq mill-kumpanija f’Marzu tal-elfejn u ebratax u li x-xogħol tal-kontrollur finanzjarju kien jieħu ħsiebu Chris Baldacchino li bħalissa qed jaffaċċja akkużi kriminali fuq ħasil ta’ flus.
Darren Debono kien ġie impjegat bħala persuna ta’ fiduċja tal-eks Ministru Nazzjonalista Joe Borg u li aktar tard kien sar Kummissarju Ewropew.
Dan filwaqt li Jeffrey Chetcuti kien intalab mill-ewro-parlamentari Nazzjonalista David Casa sabiex jiġi rrekordjat jgħid kemm iż-żewġt irġiel kienu ħbieb antiki.
