Il-Prim Ministru Robert Abela ddeskriva lill-eks Prim Ministru u eks Mexxej Laburista bħala bniedem li daqs kemm ħabb lill-ħaddiema ħabb lil pajjiżu.
Meta kien qed jindirizza seduta speċjali tal-Parlament f’ġieħ Karmenu Mifsud Bonnici, li fiha bosta ffukaw fuq l-aspett uman tiegħu, il-Prim Ministru saħaq li wieħed ma jistax ikun leali lejn l-istorja jekk iċekken l-irwol li kellu fil-politika. Huwa esprima s-sens ta’ kburija tiegħu li Mifsud Bonnici kien wieħed minn dawk li mexxew lill-Partit Laburista qablu.
Il-Prim Ministru fakkar li Mifsud Bonnici mexxa lill-pajjiż f’perjodu li ma kienx faċli għall-pajjiż; perjodu li kien ikkaratterizzat minn sfidi partikolari li ma kkontribwietx għalihom naħa waħda biss tal-ispettru politiku. Kemm dam imexxi l-Gvern bejn l-1984 u l-1987, għaraf jiggwida lill-pajjiż lejn riformi importanti u kruċjali, filwaqt li ta bidu għall-modernizzazzjoni ta’ ċerti aspetti kif jaħdem il-Gvern. Kien taħt it-tmexxija tiegħu li ddaħħlu emendi importanti fil-Kostituzzjoni, li mbagħad ġew riflessi fil-liġi eletttorali biex jiġi assigurat li l-partit li jikseb il-maġġoranza tal-voti jieħu l-Gvern.
Huwa ddeskriva dik ir-riforma bħala waħda li ġabet stabbiltà politika li bis-saħħa tagħha, l-pajjiż ibbenefika sal-lum.
Il-Prim Ministru Abela qal li anki l-mod kif Karmenu Mifsud Bonnici daħal fil-Partit Laburista kien sinifkkattiv – kien jgħid li kien Nazzjonalist bit-twelid imma Laburist bil-konvinzjoni. Ħass li kien mill-PL li seta’ jwettaq l-akbar bidliet favur il-ħaddiema. Fakkar ukoll li, fl-ewwel messaġġ tiegħu lin-Nazzjon bħala Prim Ministru fl-1984, kien iddikjara li ried iwettaq politika ta’ soċjaliżmu uman, ħanin, u demokratiku.
Dwar Karmenu Mifsud Bonnici bħala bniedem, il-Prim Ministru Abela qal li dejjem kien żomm l-imħabba lejn il-ħaddiem bħala l-prinċipju ewlieni tiegħu. Kien biedem li l-prinċipji tiegħu għexhom b’konvinzjoni, mhux biss fil-politika imma f’kull sfera oħra ta’ ħajtu bħat-trejdjunjoniżmu u l-impenn tiegħu bħala avukat. Iddedika ħajtu għan-nies u kien dejjem lest li mhux biss jisma’, iżda wkoll li jgħin minn butu lil min kellu bżonn.
Fis-snin twal li tulhom ta servizz lill-GWU, mhux biss qatt ma aċċetta li jitħallas, talli evita li jkun il-protagonist jew li jieħu xi glorja personali għall-kisbiet li jkunu twettqu.
