Biex ixerrdu l-allegazzjonijiet u l-aħbarijiet foloz, tal-Partit Nazzjonalista jirrikorru għal kull mezz li għandhom għad-dispożizzjoni tagħhom. Id-doża tan-nuqqas ta’ verità li jxerrdu, flimkien mad-doża ta’ aħbarijiet li ma jkollhom l-ebda bażi żdiedet sew kemm ilu jmexxi l-PN il-kap attwali Bernard Grech.
Mhux għaliex qabel Grech, il-kapijiet ta’ dan il-partit ma kinux jużaw dan il-mezz, għaliex l-Oppożizzjoni minn dejjem kienet medhija fil-fake news, daqskemm hija medhija tattakka l-istituzzjonijiet.
L-aħħar każ tal-Kelliem Nazzjonalista għall-Intern, is-Sigurtà u r-Riformi, Darren Carabott, għalhekk mhux uniku. L-Avukat Carabott huwa l-President tal-Kumitat Parlamentari dwar il-Kontijiet Pubbliċi, fejn huwa magħruf kif imexxi l-laqgħat b’mod partiġġjan. Huwa beda l-karriera tiegħu bħala ġurnalista u qarrej tal-aħbarijiet mal-istazzjon politiku tal-Partit Nazzjonalista. Forsi din tal-aħħar għenitu biex fil-karriera politika tiegħu jirrikorri għall-aħbarijiet foloz.
Bħal sieħbu l-eks Deputat Nazzjonalista Jason Azzopardi, Carabott jirrikorri ħafna għall-mezzi soċjali tiegħu biex ixerred il-ħsibijiet politiċi tiegħu. Sakemm jagħmel dan b’onestà politika, ma hemm xejn ħażin. Sakemm jagħmel dan biex ixerred in-nuqqas ta’ verità, ikun qed jingħaqad ma’ dawk fi ħdan il-PN li jużaw il-mezzi soċjali biex iqarrqu bl-elettorat. Tant huwa hekk, li anki Carabott kemm-il darba nqabad żbaljat jew saħansitra mitluf f’kontradizzjonijiet.
Kif għamel dan l-aħħar dwar is-sigurtà ta’ pajjiżna, meta b’kitba fuq il-mezzi soċjali tiegħu qal li s-sigurtà ta’ pajjiżna mhix prijorità għall-gvern.
Kitba li ġabet reazzjoni pronta min-naħa tal-Partit Laburista li ddeskriva lill-Oppożizzjoni bħala Oppożizzjoni tal-Facebook, li anke dwar is-sigurtà mhix kredibbli. Kontra dak li qal Carabott, it-tisħiħ fis-sigurtà ta’ pajjiżna fl-aħħar snin huwa fatt li ma jista’ jmerih ħadd. Ir-riċerka, ir-riżultati u anke rapporti internazzjonali, bħar-Rule of Law Index, jgħidu li s-sigurtà ta’ pajjiżna hija waħda b’saħħitha, b’dan tal-aħħar ipoġġi lil Malta mal-iktar għaxar pajjiżi siguri fid-dinja.
Għal tal-PN, l-aqwa li jħarbxu xi ħaġa fuq il-mezzi soċjali tagħhom. Tħarbix li huwa intenzjonat biex mhux biss jimmina l-ħidma tal-gvern, imma wkoll biex ikomplu jxerrdu nuqqas ta’ verità fl-oqsma kollha li jiktbu dwarhom.
F’Ottubru li għadda, din id-darba fil-Parlament, Darren Carabott ukoll ipprova jmexxi aħbarijiet foloz. Dan meta fil-ħin tal-mistoqsijiet parlamentari qal li l-gvern żamm u ħeba informazzjoni dwar it-tiġdid tal-kuntratt tal-Kummissarju tal-Pulizija, inkluż il-paga u l-allowance moħbija tal-Kummissarju u qal ukoll li l-gvern ħeba dan kollu.
Anki hawnhekk dak li qal kien ’l bogħod mill-verità. Fil-fatt id-dettalji dwar is-salarju tal-Kummissarju tal-Pulizija u l-ogħla uffiċjali tal-Korp kienu saru magħrufa għaliex dawn tpoġġew fuq il-mejda tal-Kamra tad-Deputati f’risposta għal mistoqsija parlamentari.
Dawn id-dokumenti juru li l-Kummissarju tal-Pulizija ma kienx l-uniku fost l-ogħla uffiċjali tal-Korp li ra bidla fil-kundizzjonijiet tiegħu. Dan għaliex wara li ssaħħu l-pagi tal-Pulizija kollha bi ftehim settorjali ġdid, kien hemm reviżjoni fil-kundizzjonijiet tas-Supretendenti, l-Assistenti Kummissarji, u d-Deputati Kummissarji.
Din tal-Kummissarju tal-Pulizija kienet waħda biss minn sensiela fosthom: il-gidba sfaċċata kontra d-Deputat Laburista Carmelo Abela li ħallietlu riperkussjonijiet personali, professjonali u politiċi; l-attakk sfrenat fuq il-ħaddiema tas-saħħa wara li l-PN ibbaża narrattiva fuq profil falz dwar il-każ ta’ mewta traġika; il-gidba tal-Membru Ewroparlamentari Nazzjonalista Peter Agius dwar l-użu tal-fondi Ewropej u r-rapport mill-OLAF wera l-allegazzjonijiet foloz ta’ Agius stess; rapport falz fil-midja Nazzjonalista dwar allegat tkeċċija ta’ kumpanija minn sit f’Għawdex u wkoll qerq sfaċċat fil-konfront tal-Ministru Jonathan Attard meta kkwotawh ħażin waqt li kien qed jindirizza konferenza dwar il-midja.
Eżempji li juru xejra konsistenti ta’ politika mill-Partit Nazzjonalista bbażata fuq fake news.
Tajjeb li jitfakkar li kien Gvern Laburista li saħħaħ il-libertà tal-espressjoni f’pajjiżna, madankollu libertà ta’ espressjoni ma tfissirx li jkollok libertà tigdeb u tiċċirkola aħbarijiet foloz.
Kumbinazzjoni f’Ottubru wkoll, imma tal-2022, anki l-Kelliem Ewlieni tal-PN dwar l-Edukazzjoni kien irrikorra għall-mezzi soċjali tiegħu u xerred aħbarijiet foloz, li mal-ewwel ukoll ġabu reazzjoni immedjata min-naħa tal-Ministeru konċernat.
Fil-kitba tiegħu fuq il-mezzi soċjali allega li studenti mill-iskola ta’ San Ġorġ f’Ħal Qormi kienu jinsabu ma jifilħux wara li xorbu minn water fountains li hemm fl-iskola. Allega wkoll li l-water fountains huma maħmuġin u li l-filters tagħhom ma jitnaddfux. Allegazzjoni li mhux biss kienet bla bażi, imma li wkoll setgħet toħloq paniku fost il-ġenituri tal-istudenti minħabba s-saħħa ta’ wliedhom. Apparti dan, Schembri tefa’ dawl ikrah fuq sħabu l-edukaturi u l-amministrazzjoni tal-iskola, għax b’dak li kiteb kien allega li dawn ma jagħtux kas l-ambjent edukattiv.
Stqarrija irresponsabbli u bla bażi li setgħet toħloq allarm bla bżonn fost l-istudenti u l-ġenituri. Stqarrija li ma kinetx ibbażata fuq il-fatti, imma biss fuq l-immaġinazzjoni tiegħu, għax il-water fountains li hemm fl-iskejjel kollha, ma joffru l-ebda periklu għal min jużahom. F’din, Schembri għażaq fl-ilma fil-veru sens tal-kelma!
Fake news oħra li ġiet imxejna mal-ewwel kemm mill-Ministeru għall-Edukazzjoni u wkoll mill-Korporazzjoni għas-Servizzi tal-Ilma li hija responsabbli minn dawn il-water fountains.
Minkejja li kien wiegħed li se jikkumbatti l-fake news, il-PN mhux talli għamel hekk, talli qed jirrikorri dejjem aktar lejn l-aħbarijiet foloz fin-nuqqas ta’ politika u viżjoni għal pajjiżna.
Il-wegħda kien għamilha fil-Programm Elettorali tal-2019. Kien wiegħed li se jsaħħaħ il-ġlieda kontra l-aħbarijiet foloz. Wegħda li għamilha fis-sezzjoni tal-Programm Elettorali dwar id-demokrazija, governanza tajba u drittijiet tal-bniedem.
Wegħda li kienet ukoll imħażża fl-ilma. Din id-darba iva, fl-ilma maħmuġ tal-politika li jħaddan il-PN, mhux l-ilma maħmuġ li kien ħolom bih Justin Schembri.
Huwa għajb li l-Kap Nazzjonalista nnifsu jirkeb fuq l-aħbarijiet foloz li jxerrdu ta’ madwaru. Kif ġara meta l-Partit Nazzjonalista xerred fake news dwar ir-riforma li kienet qed titressaq fil-Parlament intiża li tagħti aktar opportunitajiet rijabilitattivi lill-vittmi tad-droga, filwaqt li tkompli tirriforma l-liġijiet biex pajjiżna jkollu ġustizzja effettiva bi proċeduri effiċjenti.
Bl-aktar mod irresponsabbli l-Partit Nazzjonalista beda jgħid li min jinqabad b’arma tan-nar, nar jew splussiv fit-twettiq tar-reat jista’ jitqies bħala vittma u jkun jista’ jibbenefika mill-proċedura speċjali quddiem il-Qorti tad-Droga. Kienet gidba oħra tal-Partit Nazzjonalista għax il-liġi proposta kienet tgħid proprju l-kuntrarju.
F’dan il-każ, il-Kap tal-Oppożizzjoni, li matul il-konsultazzjoni pubblika dwar it-tibdil fil-liġi kien qal li r-riforma għandha tkun irtirata, beda jara ma’ xiex se jaqbad biex jiġġustifika l-pożizzjoni li ħa huwa stess, billi kompla jxerred il-fake news.
Qed isir dejjem aktar ċar li, minħabba l-inkapaċità tiegħu li jifformula viżjoni ċara ta’ dak li jirrappreżenta, il-Partit Nazzjonalista qed jagħżel li jirrikorri għall-aħbarijiet foloz. Madankollu l-kredibbiltà tal-partit li jaspira li jmexxi lill-pajjiż hija tant baxxa li n-nies jistgħu faċilment jaraw il-mezzi politikament diżonesti li qed jirrikorri għalihom.
Mezzi li mhux biss qed jaffettwaw ħażin lil dak il-ponn nies fi ħdan il-PN li huma onesti u jemmnu f’dak li xi darba kien partit denju li jiggverna, imma wkoll qed jaffettwaw ħażin lill-istess Oppożizzjoni Nazzjonalista.
Għandha tinġarr responsabbiltà politika mill-Partit Nazzjonalista li qed juża l-fake news biex mingħalih jiggwadanja politikament. Aġir li m’għandux post fis-soċjetà li ngħixu fiha llum.
