L-inħawi ta’ Ta’ Liesse, fil-Belt Valletta, se jkunu qed jieħu bixra ġdida u aktar attraenti imma, fl-istess waqt, se jkomplu jżommu l-aspett storiku tagħhom.
L-ewwel fażi tax- xogħlijiet ta’ restawr marbuta mal-proġett ta’ riġenerazzjoni f’Ta’ Liesse mistennija tiġi fi tmiemha f’Lulju li ġej.
Ix-xogħol ewlieni li sar jinvolvi r-restawr tal-aperturi kif ukoll tal-faċċati ta’ binijiet storiċi u li, tul is-snin, servew bħala punt tat-tluq kummerċjali mill-Port il-Kbir għall-qalba tal-Belt Valletta.
Ladarba dan ix-xogħol infrastrutturali jkun lest, it-tieni fażi tal-proġett se twassal biex jiġu introdotti spazji miftuħa għall-familji fl-istess inħawi.
Dawn id-dettalji tħabbru waqt żjara li għamlu f’Ta’ Liesse il-Ministru għat-Turiżmu, Clayton Bartolo, iċ-Ċermen tal-Awtorità Maltija għat-Turiżmu, Gavin Gulia, u l-Perit tal-proġett. David Zahra.
Il-Ministru Bartolo rrimarka li dan l-investiment, li jlaħħaq il-mitt elf ewro, għandu l-għan li jkompli jsaħħaħ il-prodott turistiku fil-belt kapitali.
Huwa qal li dan il-proġett jifforma parti mill-istrateġija turistika għall-għaxar snin li ġejjin. Il-Ministru Bartolo kompla jgħid li, biex il-prodott Malti jibqa’ wieħed kompettitiv, jeħtieġ li bħala pajjiż inkomplu nkunu akar proattivi u nħarsu mhux biss lejn il-manutenzjoni u l-indafa pubblika imma wkoll lejn riġenerazzjoni kontinwa.
Il-Ministru għat-Turiżmu saħaq li hija din il-mentalità li għandha tmexxina ’l quddiem bħala pajjiż, biex naslu għat-tir aħħari, li Malta ssir ċentru ta’ eċċellenza turistika fil-Mediterran.
Mal-Ministru Bartolo tkellimna dwar kemm hu kruċjali li proġett bħal dan f’Ta’ Liesse ikun parti mill-istrategija turistika tal-Gvern għall-għaxar snin li ġejjin
Qal, “B’investiment ta’ mitt elf ewro qed naraw li niġġeneraw il-parti t’isfel ta’ Ta’ Liesse fil-Belt Valletta. Hawnhekk huwa l-post minn fejn kienet tibda l-ħajja u l-kummerċ fil-Belt fis-snin li għaddew u issa rridu nerġgħu naraw li din il-parti terġa’ tingħata l-ħajja u, fuq kollox, tkun pedina importanti biex il-Belt kapitali tagħna tkompli tattira aktar turisti fiż-żmien illi ġej. U, apparti minn hekk, inkomplu naħdmu sabiex Malta tkun verament ċentru ta’ eċċellenza fil-Mediterran għall-futur.”
Iċ-Ċermen tal-Awtorità Maltija għat-Turiżmu, Gavin Gulia, saħaq kemm proġetti bħal dawn jgħinu sabiex pajjiżna jkompli jiġbed aktar turiżmu lejh.
Qal, “Xogħol l-Awtorità Maltija għat-Turiżmu m’hux biss waħda regolatorja, mhix biss katalista tat-turiżmu biex iġġib it-turisti lejn pajjiżna permezz tal-marketing, imma hija l-ħolqien, kif ukoll ir-restawr, il-preservazzjoni, u r-riġenerazzjoni tal-prodott. U għalfejn? Għax mingħajr prodott ma jistax ikollok turiżmu. It-turisti għalfejn jiġu? It-turisti jiġu biex ikollhom esperjenza sħiħa, ħolistika, u jgawdu dak kollu li pajjiżna għandu x’joffri. Hemm l-aspett tal-bajjiet, hemm l-aspett tal-baħar, però hemm l-aspett ukoll tal-kultura u tal-istorja, u l-Awtorità Maltija għat-Turiżmu qiegħda tiffoka ħafna fuq ir-restawr tal-icons storiċi ta’ pajjiżna sabiex jagħmel lil pajjiżna aktar attraenti għat-turist potenzjal lejn pajjiżna.”
